Sirdaryo tumanida tadbirkorning qarzdorligini yo‘q qilib bermoqchi bo‘lgan elektr tarmoqlari korxonasi muhandisi ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Sirdaryo tumani bo‘limlari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Tadbir davomida tuman elektr tarmoqlari korxonasi muhandisi O‘.T. tadbirkor Sh.ning savdo do‘konidagi elektr energiyasidan 5 million so‘m qarzdorligini tanishlari yordamida yo‘q qilish va yangi elektr hisoblagich o‘rnatib berishni va’da qilgani aniqlangan. Buning evaziga u tadbirkordan 2,5 million so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Andijondagi savdo majmuasi elektr energiyasidan noqonuniy foydalanib, qariyb 2 mlrd so‘m zarar yetkazgani, Jizzaxda 45 mingdan ortiq aholi xonadonining 1 oylik iste’moliga teng elektr energiyasidan noqonuniy foydalanilgani aniqlangani to‘g‘risida xabar berilgandi.
Izoh (0)