Ukrainadan Ruminiyaga qochib o‘tgan opa-singillar Turkiya orqali O‘zbekistonga qaytarildi

Ukrainadan Ruminiyaga o‘tgan ikki nafar O‘zbekiston fuqarosi vatanga qaytarildi, deb xabar beradi “Dunyo” agentligi.

O‘zbekistonning Istanbuldagi Bosh konsulxonasi ma’lumotiga ko‘ra, 1-aprel kuni vakolatxonaga O‘zbekiston fuqarolari opa-singil Alina Ismagilova (1992-yilda tug‘ilgan) va Yelvina Ismagilovaning (1994-yilda tug‘ilgan) murojaati kelib tushgan. Unda ushbu ikki fuqaroni Ruminiyadan O‘zbekistonga qaytarish yuzasidan amaliy yordam so‘ralgan.

Murojaatchilarning so‘zlariga ko‘ra, ular mart oyida Ukrainaning Odessa shahridan Ruminiyaning Buxarest shahriga gumanitar yo‘lak orqali qochib o‘tgan.

Bosh konsulxonaning sa’y-harakatlari bilan ushbu fuqarolar 2-aprel kuni Turkiyaning Istanbul shahriga betalafot yetib kelgan. 2—5-aprel kunlari ular Istanbuldagi mehmonxonalardan biriga joylashtirilib, zarur oziq-ovqat bilan ta’minlangan.

Turkiyadagi homiylar mablag‘lari hisobidan ikkita aviachipta xarid qilinib, opa-singil Ismagilovalar 5-aprel kuni O‘zbekistonga qaytarilgan.

Eslatib o‘tamiz, 19-mart kuni O‘zbekiston fuqarolarini Ukrainadan evakuatsiya qilish jarayonlari yakunlangani to‘g‘risida xabar berilgandi. Keyinroq O‘zbekiston Tashqi ishlar vazirligi fuqarolarni Ukrainadan evakuatsiya qilish hali yakunlanmaganini, 23-mart kuni 146 nafar o‘zbekistonlik vatanga qaytarilganini ma’lum qildi.