Surxondaryo viloyatining Sho‘rchi tumanida ikki kishini o‘ldirganlikda gumon qilingan 38 yoshli shaxs Rossiyaning “Domodedovo” aeroportida qo‘lga olingani to‘g‘risida xabar berilgandi. Viloyat IIB qotillikning sodir etilishiga bog‘liq ma’lumotlar bilan bo‘lishdi.
Ma’lum bo‘lishicha, Sariosiyo tumani “Toqchiyon” mahallasida ro‘yxatda turgan, ammo Toshkent viloyati Angren shahrida yashovchi S.N. Rossiyaga ishlashga ketib, turmush o‘rtog‘i Z.M. unga xiyonat qilib kelganini bilib qolgan. 2022-yilning yanvar oyida u O‘zbekistonga qaytib kelgan. Kelishi bilan voyaga yetmagan 3 nafar farzandini o‘zi bilan olib qolib, turmush o‘rtog‘ini u bilan ajrashish maqsadida uydan chiqarib yuborgan.
Shundan so‘ng er-xotin o‘rtasida farzandlar kimda qolish-qolmasligi ustidan tortishuv boshlangan. S.N. sobiq xotinining akasiga Z.M. uni tinch qo‘yishi lozimligini, farzandlarini olish uchun sudga ariza bermasligini, agar ariza bergan taqdirda uni o‘ldirish bilan tahdid qilgan. Biroq Z.M. sud orqali farzandlarini o‘ziga olish uchun da’vo ariza yozib, taqdim qilish choralarini ko‘rayotganini bilib, undan o‘ch olish maqsadida reja tuzgan.
Turmush o‘rtog‘i Z.M.ga o‘g‘li A.ni ko‘rsatish uchun olib borishini, u bilan yarashmoqchi ekanini aytib, Nexia-3 rusumli transport vositasida turmush o‘rtog‘ining onasi X.X. bilan yashab kelayotgan Sho‘rchi tumani “Yakkabog‘” mahallasidagi yashash uyiga borgan. O‘g‘lini qaynonasi X.X. va turmush o‘rtog‘i Z.M. bilan uchrashtirgan. Shunda keyin o‘g‘lini mashina ichiga qo‘yib, qaynonasi va xotinining uxlashini kutgan. O‘ziga qulay vaqt paydo bo‘lganidan so‘ng yashash uyiga kirib, ayvonda uxlab yotgan qaynonasi va xotinining bo‘yin qismiga o‘tkir kesib-sanchuvchi jism bilan tan jarohati yetkazgan. Ular ko‘p qon yo‘qotish natijasida voqea joyida vafot etgan.
Holat yuzasidan viloyat prokuraturasi tomonidan Jinoyat kodeksining 97-moddasi (qasddan odam o‘ldirish) 2-qismi “a, j” bandlari bilan jinoyat ishi qo‘zg‘atilgan.
IIV Jinoyat qidiruv bosh boshqarmasi hamda Tojikiston IIV Jinoyat qidiruv bosh boshqarmasi bilan hamkorligida amalga oshirilgan qidiruv ishlari natijasida gumondor N.S. javobgarlikdan qutulish maqsadida Surxondaryo viloyatidan Tojikistonga o‘tib, u yerdan Rossiyaga ketgani aniqlangan.
Rossiyada xizmat safarida bo‘lgan Surxondaryo viloyati IIB Jinoyat qidiruv boshqarmasi xodimlari tomonidan rossiyalik hamkasblari hamkorligida gumondor shaxs Moskva viloyatining “Domodedovo” aeroportida qo‘lga olingan.
Avvalroq Jizzaxda ikki uka opasi bilan spirtli ichimlik ichib o‘tirgan yigitni kaltaklab, o‘ldirgani, Buxoroda qo‘shni ayolni o‘roq bilan o‘ldirgan 71 yoshli erkakka hukm o‘qilgani, Buxoroda xotinini qasddan o‘ldirgan er 13 yilga qamalgani to‘g‘risida xabar berilgandi.
Izoh (0)