Samarqandda tuman elektr ta’minoti korxonasi rahbari iste’molchi tomonidan pichoqlangani to‘g‘risida xabar berilgandi. “Hududiy elektr tarmoqlari” AJ mazkur holatga munosabat bildirdi.
Ma’lum qilinishicha, Kattaqo‘rg‘on tumanida faoliyat yurituvchi “Zarina fayz kelajagi” MCHJ korxonasi elektr energiyasidan 57 million so‘mlik muddati o‘tgan qarzdorligi uchun tuman elektr ta’minoti korxonasi mas’ullari tomonidan o‘chirilgan.
Shundan so‘ng MCHJ rahbari Qoradaryo elektr ta’minoti korxonasi rahbari Pirxon Nazarovdan elektr energiyasidan qarzdorligi mavjud bo‘lsa-da, tarmoqqa qayta ulab berishni talab qilgan. Korxona rahbari o‘z navbatida qarzdorlik to‘liq bartaraf etilgach, iste’molchi tarmoqqa qayta ulanishini ma’lum qilgan.
Korxona rahbarining asosli talabini bajarishni istamagan MCHJ rahbari kelishmovchilik davomida o‘zi bilan yonida olib kirgan pichoq bilan o‘qtalib, tuman elektr ta’minoti korxonasi rahbarining bo‘yin qismiga jarohat yetkazgan.
Hozirda tuman elektr ta’minoti korxonasi rahbari shifoxonaga joylashtirilgan va shifokorlar nazoratida. Ahvoli qoniqarli. O‘tkazilgan tahlillar natijasida uning chap tomonlama bo‘yin old yon sohasida kesilgan jarohat borligi aniqlangan.
Ayblanuvchiga nisbatan Jinoyat kodeksining tegishli bandlari asosida ish qo‘zg‘atilgan hamda protsessual tartibda ushlanib, qamoqqa olingan.
Ta’kidlanishicha, 2022-yilning 1-aprel kunidan boshlab Samarqand viloyatida “Hududiy elektr tarmoqlari” AJ tomonidan tashkil etilgan ishchi guruhi tomonidan joylarda elektr energiyasidan katta miqdorda qarzdor bo‘lgan hamda turli xil yo‘llar bilan tarmoqqa noqonuniy ulanib olgan tadbirkorlik subyektlari va aholi xonadonlarini aniqlash, tegishli tartibda qonunbuzarlik uchun jarimaga tortish yuzasidan chora-tadbirlar olib borilmoqda. Xususan, 13 kun mobaynida ishchi guruhi tomonidan viloyatda 130 dan ortiq iste’molchi elektr energiyasidan o‘g‘rincha foydalanayotgani aniqlanib, ular tomonidan yetkazilgan 1334,8 ming kilovatt/soat elektr energiyasi yoki 400,4 million so‘m qayta hisoblangan.
Izoh (0)