Qashqadaryoda faoliyat yurituvchi bloger Kapitan Karimov Qarshi shahridagi 33-sonli imkoniyati cheklangan bolalar uchun ixtisoslashtirilgan maktab o‘qituvchilarining muammosini olib chiqib, ularning oylik maoshiga qo‘shimcha to‘lanayotgan ustamalar berilmayotganini e’lon qilgandi. Viloyat prokuraturasi mazkur murojaatga javob qaytardi.
Qarshi shahar prokuraturasining avvalroq o‘rgangan xulosalariga ko‘ra, o‘qituvchilar murojaatidagi ustama to‘g‘risidagi holat o‘z tasdig‘ini topmagan.“Vazirlar Mahkamasining 1994-yil 29-sentabrdagi qarori ilovasiga asosan uyda yakka tartibda ta’lim beruvchi o‘qituvchilarning lavozim maoshlariga oyiga 50 foiz qo‘shimcha ustama to‘lanishi belgilangan. Shuningdek, Vazirlar Mahkamasining 1997-yil 20-avgustdagi qaroriga asosan mazkur maktab internati o‘qituvchilariga jismoniy yoki aqliy rivojlanishida kamchiligi bo‘lgan bolalar va o‘smirlar uchun maxsus o‘quv-tarbiya sinflaridagi alohida ish sharoitlari uchun pedagog xodimlarning lavozim maoshlariga 100 foiz ustama to‘lab kelingan. Viloyat davlat moliyaviy nazorat boshqarmasi mutaxassislari tomonidan o‘tkazilgan tekshirishda uyda yakka tartibda ta’lim beruvchi o‘qituvchilarning ish haqiga 50 foiz ustama to‘lash bilan birga asossiz ravishda Vazirlar Mahkamasi qarorida ko‘rsatilgan 100 foiz ustama ham to‘lab berilgan. Shu sababli maktabning uyda yakka tartibda ta’lim beruvchi o‘qituvchilariga 100 foizlik ustama hisoblanishi to‘xtatilgan”, — deyiladi viloyat prokuraturasi axborotida.
Prokuratura murojaatchilarning ikkinchi masalasi — shahar xalq ta’limi bo‘limi mudirining imkoniyati cheklangan bolalar uchun ixtisoslashtirilgan maktabda shanba kunlari dars o‘tmasdan maosh olayotgani to‘g‘risidagi ma’lumotini tasdiqlagan.
“Shahar xalq ta’limi bo‘limi mudiri tomonidan dars o‘tilganligi haqida soxta hujjatlar rasmiylashtirilib, 2021-aprel oyidan 2022-yil yanvar oyiga qadar 9 million 480 ming 100 so‘m miqdorida oylik ish haqlari to‘lab berilib, budjet mablag‘lari rastrata qilish yo‘li bilan talon-toroj qilingan. Shu va boshqa holatlar yuzasidan Qarshi shahar prokuraturasi tomonidan 2022-yilning 17-mart kuni 33-sonli imkoniyati cheklangan bolalar uchun ixtisoslashtirilgan maktab mansabdor shaxslari va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, hozirda tergov harakatlari olib borilmoqda”, — deydi viloyat prokuraturasi mas’ullari.
Izoh (0)