Surxondaryo viloyatining Sho‘rchi tumanida ikki kishini o‘ldirganlikda gumon qilingan 38 yoshli shaxs Rossiyaning “Domodedovo” aeroportida qo‘lga olindi, deb xabar beradi viloyat IIB axborot xizmati.
Ma’lum qilinishicha, 6-aprel kuni soat 18:30 larda tumanning “Yakkabog‘” mahallasida joylashgan xonadonlaridan birida nafaqaxo‘r, 57 yoshli X.X.ning jasadi bo‘yin sohasiga o‘tkir tig‘li jism bilan yetkazilgan tan jarohatlari hamda qizi, Sariosiyo tumani “Zag‘nabod” qishlog‘ida doimiy ro‘yxatda turuvchi, uy bekasi, 30 yoshli M.Z.ning jasadi yuqori nafas yo‘llari va bo‘yin a’zolariga o‘tkir tig‘li jism yordamida yetkazilgan tan jarohatlari bilan topilgan.
Holat yuzasidan viloyat prokuraturasi tomonidan Jinoyat kodeksining 97-moddasi (qasddan odam o‘ldirish) 2-qismi “a, j” bandlari bilan jinoyat ishi qo‘zg‘atilgan.
Surxondaryo viloyati IIB Jinoyat qidiruv boshqarmasi tomonidan mazkur qotillik jinoyatini sodir etishda gumonlangan K.H.ning sobiq turmush o‘rtog‘i, Sariosiyo tumanida istiqomat qiluvchi, 38 yoshli N.S.ga nisbatan mahalliy va xalqaro qidiruv e’lon qilingan.
IIV Jinoyat qidiruv bosh boshqarmasi hamda Tojikiston IIV Jinoyat qidiruv bosh boshqarmasi bilan hamkorligida amalga oshirilgan qidiruv ishlari natijasida gumondor N.S. javobgarlikdan qutulish maqsadida Surxondaryo viloyatidan Tojikistonga o‘tib, u yerdan Rossiyaga ketgani aniqlangan.
Rossiyada xizmat safarida bo‘lgan Surxondaryo viloyati IIB Jinoyat qidiruv boshqarmasi xodimlari tomonidan rossiyalik hamkasblari hamkorligida, gumondor shaxs Moskva viloyatining “Domodedovo” aeroportida qo‘lga olingan.
Hozirda gumondorni O‘zbekistonga qaytarish choralari ko‘rilmoqda.
Avvalroq O‘zbekistonda firibgarlik sodir etgani uchun xalqaro qidiruvda bo‘lgan shaxs Polshadan ekstraditsiya qilingani to‘g‘risida xabar berilgandi.
Izoh (0)