Rossiya restoratorlari O‘zbekistonning sabzavot, meva, to‘qimachilik va vino ishlab chiqaruvchilari bilan hamkorlikni yo‘lga qo‘yishga tayyor. Bu haqda Rossiya restoratorlar va mehmonxonachilar federatsiyasi prezidenti Igor Buxarov ma’lum qildi, deb xabar beradi “RIA Novosti”.
Ma’lum qilinishicha, federatsiya rahbari O‘zbekistonning Rossiyadagi elchisi Botir Asadov bilan uchrashuv o‘tkazgan. Unda federatsiyaning Rossiyadagi restoran va mehmonxonalar uchun O‘zbekiston mahsulotlari ishlab chiqaruvchilari bilan o‘zaro hamkorligi muhokama qilindi.
“Bizni sabzavotlar, mevalar, yong‘oqlar qiziqtiradi. O‘zbekistonda butun boshli agrosanoat klasterlari mavjud. Shuningdek, u yerda paxtadan gazlama hamda mehmonxona va restoranlar uchun to‘qimachilik mahsulotlarini tayyorlaydigan yengil sanoat klasterlari bor. Hatto o‘zining vino zavodi ham bo‘lib, ular ushbu mahsulotni yetkazib berishga tayyor”, — deydi Buxarov.
Uning ta’kidlashicha, oldinlari O‘zbekiston mahsulotlari asosan bozorga yetkazib berilgan, restoratorlar bilan esa hamkorlik yo‘lga qo‘yilmagan.
“May oyida rossiyalik yetkazib beruvchilar va xaridorlar uchun maxsus tadbir o‘tkazishga kelishib oldik. Restoratorlar barchasini tatib ko‘rishi va to‘g‘ridan to‘g‘ri shartnoma imzolashi uchun ularni shu tadbirga chaqiramiz”, — deya qo‘shimcha qiladi federatsiya rahbari.
Eslatib o‘tamiz, mart boshlarida Rossiya O‘zbekistondan pomidor va qalampir importiga qo‘yilgan barcha cheklovlarni bekor qilgandi.
Izoh (0)