Қашқадарёда фаолият юритувчи блогер Капитан Каримов Қарши шаҳридаги 33-сонли имконияти чекланган болалар учун ихтисослаштирилган мактаб ўқитувчиларининг муаммосини олиб чиқиб, уларнинг ойлик маошига қўшимча тўланаётган устамалар берилмаётганини эълон қилганди. Вилоят прокуратураси мазкур мурожаатга жавоб қайтарди.
Қарши шаҳар прокуратурасининг аввалроқ ўрганган хулосаларига кўра, ўқитувчилар мурожаатидаги устама тўғрисидаги ҳолат ўз тасдиғини топмаган.«Вазирлар Маҳкамасининг 1994 йил 29 сентябрдаги қарори иловасига асосан уйда якка тартибда таълим берувчи ўқитувчиларнинг лавозим маошларига ойига 50 фоиз қўшимча устама тўланиши белгиланган. Шунингдек, Вазирлар Маҳкамасининг 1997 йил 20 августдаги қарорига асосан мазкур мактаб интернати ўқитувчиларига жисмоний ёки ақлий ривожланишида камчилиги бўлган болалар ва ўсмирлар учун махсус ўқув-тарбия синфларидаги алоҳида иш шароитлари учун педагог ходимларнинг лавозим маошларига 100 фоиз устама тўлаб келинган. Вилоят давлат молиявий назорат бошқармаси мутахассислари томонидан ўтказилган текширишда уйда якка тартибда таълим берувчи ўқитувчиларнинг иш ҳақига 50 фоиз устама тўлаш билан бирга асоссиз равишда Вазирлар Маҳкамаси қарорида кўрсатилган 100 фоиз устама ҳам тўлаб берилган. Шу сабабли мактабнинг уйда якка тартибда таълим берувчи ўқитувчиларига 100 фоизлик устама ҳисобланиши тўхтатилган», — дейилади вилоят прокуратураси ахборотида.
Прокуратура мурожаатчиларнинг иккинчи масаласи — шаҳар халқ таълими бўлими мудирининг имконияти чекланган болалар учун ихтисослаштирилган мактабда шанба кунлари дарс ўтмасдан маош олаётгани тўғрисидаги маълумотини тасдиқлаган.
«Шаҳар халқ таълими бўлими мудири томонидан дарс ўтилганлиги ҳақида сохта ҳужжатлар расмийлаштирилиб, 2021 апрель ойидан 2022 йил январь ойига қадар 9 миллион 480 минг 100 сўм миқдорида ойлик иш ҳақлари тўлаб берилиб, бюджет маблағлари растрата қилиш йўли билан талон-торож қилинган. Шу ва бошқа ҳолатлар юзасидан Қарши шаҳар прокуратураси томонидан 2022 йилнинг 17 март куни 33-сонли имконияти чекланган болалар учун ихтисослаштирилган мактаб мансабдор шахслари ва бошқаларга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, ҳозирда тергов ҳаракатлари олиб борилмоқда», — дейди вилоят прокуратураси масъуллари.
Изоҳ (0)