Rubl so‘mga nisbatan 2022-yildagi eng baland qiymatiga ko‘tarildi

Markaziy bank xorijiy valyutalarning o‘zbek so‘miga nisbatan 8-aprelda amalda bo‘ladigan qiymatini belgiladi.

Taqqoslash uchun 9-mart kuni, rubl so‘mga nisbatan 80 so‘mga baholanayotgan edi. Shu tariqa rubl bir oy ichida so‘mga nisbatan qariyb ikki barobarga mustahkamlandi.

4-mart kuni O‘zbekistonda jismoniy shaxslar 86,5 mln rubllik Rossiya valyutasini xarid qilgan edi. O‘sha vaqtda rublning so‘mga nisbatan qiymati 93,04 so‘m edi.

3-mart kuni esa Markaziy bank rubl qadrsizlanayotgani tufayli zaruriy choralar ko‘rishni boshlagan edi. Unga ko‘ra O‘zbekistondagi barcha banklarda rubldagi pul o‘tkazmalari bo‘yicha ayirboshlash operatsiyalarini uzluksiz amalga oshirish belgilangan edi. 

Bundan tashqari banklarga Rossiya rublini sotish va sotib olish kurslarini joriy xalqaro kotirovkalarga asosan kun davomida o‘zgartirib borish tavsiya qilingandi.

Rubl mustahkamlanishining asosiy 8 sababi:

— fevral oyi oxirida asosiy stavka 20 foizgacha oshirildi;

— dollar, yevro, funt sotib olish uchun 12 foizlik komissiyalar joriy etildi;

— naqd pul olish va chet elga o‘tkazish bo‘yicha cheklovlar qabul qilindi;

— barcha tashqi savdo agentlari uchun eksport tushumini majburiy sotish me’yori 80 foizgacha oshirildi;

— “budjet qoidasi” ijrosi to‘xtatildi;

— norezidentlar fond bozoridan uzilib, ularning qimmatli qog‘ozlarga bo‘lgan huquqlariga moratoriy joriy etildi;

— turizm to‘xtadi;

— G‘arb tomonidan Rossiyaga yetkazib beriladigan mahsulotlarga ham cheklovlar kiritildi.

Shu sabablarga ko‘ra, rubl nafaqat so‘mga, balki dollar, yevro va boshqa valyutalarga nisbatan ham o‘sib bormoqda.

Avvalroq O‘zbekistonda bir necha kundan buyon rubl kursi ko‘tarilayotgani sabablari ma’lum qilingan edi.