Ijtimoiy tarmoqlarda maktablarning rus tili fani o‘qituvchilari attestatsiyasi malaka (test) sinovlari yuzasidan norozilik bildirib, bir necha murojaat yo‘llagani tarqaldi. Vazirlar Mahkamasi huzuridagi Ta’lim sifatini nazorat qilish davlat inspeksiyasi mazkur holatga munosabat bildirdi.
Ma’lum qilinishicha, ta’lim tili rus tili bo‘lmagan umumta’lim muassasalar (sinflar)da faoliyat yuritayotgan kamida C1 va undan yuqori darajadagi milliy yoki unga tenglashtirilgan mos darajadagi xalqaro tan olingan sertifikatga ega rus tili fani o‘qituvchilariga 50 foiz miqdorida ustama to‘lanishi yo‘lga qo‘yilgan. Ushbu o‘qituvchilarga attestatsiyasining malaka test sinovlariga jalb qilmasdan eng yuqori ball berish tartibi joriy qilingan. Bundan tashqari, rossiyalik malakali mutaxassislar tashrif buyurib, rus tili o‘qituvchilari malakasini oshirishga ko‘maklashgan.
Xususan, ta’lim tili rus tili bo‘lmagan umumta’lim muassasalar (sinflar)da faoliyat yuritayotgan kamida C1 va undan yuqori darajadagi milliy yoki unga tenglashtirilgan mos darajadagi xalqaro tan olingan sertifikatga ega 3,6 ming nafar rus tili fani o‘qituvchilariga 2022-yilning birinchi yarmida o‘tkazilayotgan malaka (test) sinovlariga jalb qilinmasdan eng yuqori ball berilgan. Sertifikatini attestatsiya hujjat topshirish yakunlanganidan keyin olgan pedagoglarda esa 2022-yilning ikkinchi yarmida attestatsiyada ishtirok etmasdan toifa olish imkoniyati mavjud.
2022-yilda ta’lim tili rus tili bo‘lmagan maktab o‘qituvchilari uchun o‘tkazilayotgan malaka (test) sinovlarida ushbu sertifikatni ola olmagan yoki hali olishga ulgurmagan 9 391 nafar o‘qituvchi jalb qilingan. Test sinovlari natijasiga ko‘ra respublika bo‘yicha o‘rtacha ball 40 ballni (80 ballga nisbatan) tashkil etgan.
C1 darajadagi xalqaro va milliy sertifikati bor pedagoglar bilan qo‘shib hisoblanganda jami 4 786 nafar (36,84 foiz) pedagoglar toifasini oshirgan, 1 187 nafar (9,14 foiz ) pedagog toifasini saqlagan va 7 018 nafar (54,02 foiz) pedagog salbiy natija qayd etgan. C1 darajadagi xalqaro va milliy sertifikatisiz o‘qituvchilar kesimida tahlil qilinganda 2 373 nafar (25 foiz) pedagog ijobiy natija qayd etgan. Salbiy natija qayd etgan pedagoglarning 70 foizi navbatdan tashqari o‘z ixtiyori bilan attestatsiyada ishtirok etgan bo‘lib, Vazirlar Mahkamasining 572-sonli qarori bilan tasdiqlangan nizomning 7-bandiga asosan ularga nisbatan salbiy qaror chiqarilmaydi hamda ular amaldagi toifasi bo‘yicha maosh oladi.
Ta’kidlanishicha, har yili malaka sinovlari oldidan aprobatsiya sinovlari tashkil etiladi. Ushbu jarayonlar haqiqiy imtihon jarayonlariga yaqinlashtirilgan bo‘lib, 40 ta test topshirig‘i bir soat vaqt beriladi. Natijasi esa o‘qituvchilarni yangi mazmundagi test formati bilan tanishtirish, vaqt me’yorlarini sinovdan o‘tqazish hisoblanadi. Misol uchun, aprobatsiya jarayonida jami 40 test uchun o‘rtacha 55 daqiqa sarflashgan bo‘lsa, bu haqiqiy imtihonda 56 daqiqani tashkil etadi.
“Ko‘pchilik pedagoglarimiz eskicha testlarga o‘rganib qolishgani attestatsiya jarayonida sezilib qoldi. Zamonaviy pedagogik texnologiyalarga asoslangan, moslashtirishni, mantiqiy qiyoslashni talab etuvchi, yangi shakldagi testlarni og‘riqli qabul qilishdi. Barcha test savollari amaldagi ta’lim dasturiga muvofiq va Davlat ta’lim standartlari talablariga mos ravishda tuzilgan. Ushbu fandan appelyatsiya jarayonida ishtirok etgan murojaatchilarga fan mutaxassisi tomonidan qayerda xato qilganini tushuntirib berildi”, — deyiladi munosabatda.
Qayd etilishicha, hukumat qaroriga asosan 2022-yil 1-sentabrdan boshlab chet tili fani o‘qituvchilar, shu jumladan, rus tili fani o‘qituvchilari attestatsiyasi jarayonida o‘quv fani bo‘yicha malaka sinovlari Ta’lim sifatini nazorat qilish davlat inspeksiyasi tomonidan tinglab tushunish, o‘qish, yozish hamda gapirish kompetensiyalarini baholashni nazarda tutuvchi kasbiy sinov shaklida amalga oshiriladi. Sinovlarni yangicha tartibda o‘tkazish uchun ayni paytda ilg‘or xorijiy tajribalar o‘rganilmoqda.
Bunda C1 darajadagi milliy yoki unga tenglashtirilgan mos darajadagi xalqaro tan olingan sertifikatga ega chet tili fani o‘qituvchilariga o‘quv fani bo‘yicha malaka sinovidan maksimal ball berish tartibi saqlab qolinadi.
“Ayni kunlarda attestatsiyadan o‘ta olmagan ayrim pedagoglar Telegram ijtimoiy tarmog‘ida guruh tashkil qilgan holda hamkasblari o‘rtasida yuqori turuvchi tashkilotlarga ko‘proq ariza berilsa, deputatlarga, jurnalist va blogerlar murojaat qilinsa, ijtimoiy tarmoqlarda ko‘proq e’tirozlar bildirilsa, natijalar bekor bo‘lib ball qo‘shib berilishi yoki qayta imtihon o‘tkazilishi mumkin, deya xato targ‘ibotlar olib borishmoqda. Hattoki blogerlar orqali e’tirozlarni e’lon qilish uchun pul yig‘ish takliflari ilgari surilmoqda.
Hurmatli pedagoglar, ushbu targ‘ibotlarga ishonib, qimmatli vaqtingizni bekorga sarflamay, Ta’lim inspeksiyasiga o‘rnatilgan tartibda murojaat qilishingizni so‘rab qolamiz. Hududlarda bo‘lgan o‘qituvchilarga Zoom dasturi orqali muloqot tashkil qilish imkoniyati bor. Biz e’tirozlar bo‘yicha ustozlarni tinglashga, muloqot qilishga va testlarda yo‘l qo‘yilgan xatolarni ko‘rsatib berishga tayyor ekanligimizni ma’lum qilamiz”, — deya ta’kidlanadi munosabatda.
Eslatib o‘tamiz, O‘zbekiston prezidentining 2021-yil maydagi qaroriga muvofiq ta’lim muassasalarining kamida C1 darajadagi milliy yoki unga tenglashtirilgan mos darajadagi xalqaro tan olingan sertifikatga ega xorijiy tillar o‘qituvchilariga ularning bazaviy tarif stavkasiga nisbatan har oylik 50 foiz miqdorida qo‘shimcha ustama haqi to‘lab borish nazarda tutilgan.
Bundan avval O‘zbekistonda to‘liq chet tillarida efirga uzatiladigan yangi telekanallar ishga tushirilishi, O‘zbekistonda 2022-yildan davlat idoralariga ishga qabul qilishda xorijiy tilni bilish majburiy talab qilinishi hamda Prezident matbuot kotibi O‘zbekistonda xorijiy tillar “bog‘cha – maktab – oliy ta’lim – korxona” zanjiri asosida o‘rganilishini ma’lum qilgani haqida xabar berilgandi.
Izoh (0)