Samarqandda bog‘cha tarbiyalanuvchisining kaltaklangani bo‘yicha jinoyat ishi qo‘zg‘atish rad etildi

Samarqanddagi xususiy bog‘chalardan birida tarbiyalanuvchi bola kaltaklangani va tarbiyachi o‘z arizasiga ko‘ra ishdan bo‘shagani haqida xabar berilgandi. Samarqand viloyati IIB matbuot kotibining ma’lum qilishicha, mazkur xususiy bog‘chada sodir bo‘lgan holat yuzasidan jinoyat ishini qo‘zg‘atishdan rad etish bo‘yicha qaror qabul qilingan.

Tergovga qadar tekshiruv harakatlari davomida bog‘cha tarbiyalanuvchisi, voyaga yetmagan U.F.ning tanasida tan jarohatlari bor yoki yo‘qligini aniqlash maqsadida sudga oid tibbiy ekspertiza tayinlangan.

RSTEIAM Samarqand filialining 4-aprel kunidagi sudga oid tibbiy ekspertiza xulosasiga ko‘ra, sud tibbiy tekshiruvi vaqtida U.F.ning tanasida biror-bir tan jarohatlari topilmagani ko‘rsatilgan.

Holat yuzasidan Samarqand tuman IIB huzuridagi Tergov bo‘limi tomonidan tergovga qadar tekshiruv harakatlari olib borilgan. Mazkur holatda jinoyat alomatlari yo‘qligi sababli 4-aprel kuni Jinoyat-protsessual kodeksining 83-moddasi 2-bandiga asosan jinoyat ishini qo‘zg‘atishdan rad etish haqida qaror qabul qilingan.

Avvalroq Samarqandda bolalarni igna tiqib qo‘rqitgan xususiy bog‘cha tarbiyachisiga nisbatan jinoyat ishi qo‘zg‘atilgan edi.