Toshkentda mozaikalarni tozalash boshlandi. Ularni baribir bo‘yab tashlash rejada bo‘lgan

Toshkentning Chilonzor tumanidagi “Katta Olmazor” mahallasida joylashgan 14-uyning fasadidagi sement aralashmani ko‘chirib tashlash boshlandi, deb xabar beradi “Gazeta.uz”.

Avvalroq ijtimoiy tarmoqlarda “Katta Olmazor” mahallasida joylashgan ko‘p qavatli uylarning fasad qismidagi bezakli kafellarning usti bo‘yalayotgani to‘g‘risida xabarlar tarqalgandi. Tuman hokimligi holatga munosabat bildirib, mozaikalarni bo‘yash ishlari to‘xtatilganini bildirgandi. Toshkent shahar hokimligi mozaikalar bo‘yab tashlanmayotgani, aksincha, ularni saqlab qoluvchi maxsus qoplama surilayotganini ma’lum qilgandi.

“Material qum-oqim usuli bilan yuviladi va mozaika tasvirlari poytaxtimiz aholisi ko‘zi oldida o‘zining boshlang‘ich, biroq endi mustahkamroq ko‘rinishida namoyon bo‘ladi”, — deydi hokimlik Xalq deputatlari Toshkent shahar kengashini madaniy merosni yo‘q qilinishiga e’tiborsizlikda ayblagan blogerni tanqid qilib.

Mozaika chindan ham sementdan tozalana boshladi. Shuningdek, buning uchun haqiqatan ham qum-oqim usuli qo‘llanilmoqda (bu aslida mozaikaga juda yomon ta’sir qilishi mumkin). Biroq nashrning dushanba va chorshanba kunlari ishchilar bilan suhbatida ma’lum bo‘lishicha, aslida, avval-boshida ushbu ko‘chalardagi uylarning fasadini keng ko‘lamli ta’mirlash vaqtida mozaikalarni bo‘yash rejalashtirilgan bo‘lgan.

Aynan shu maqsadda mozaikaga avval maxsus qoplama bilan ishlov berilgan, keyin esa sement aralashma bilan qoplangan va uning ustiga bo‘yoq qo‘llanilishi kerak bo‘lgan.

Ta’kidlanishicha, hafta boshidan beri uylarni sement aralashma bilan qoplash ishlari to‘xtamayotgan edi. Hozirda ham bu ishlar faol davom etmoqda. Aralashmani panelli uylarning fasad qismlari, burchaklari va ichki tomonlariga, shu jumladan mozaik plitkalarga surtilmoqda.

Ishchilarning ma’lum qilishicha, hozircha uylarning faqat dekorativ panellari o‘rnatilgan burchaklarini sementdan tozalash rejalashtirilgan. Bitta uy deyarli tozalangan, yana bittasi bor. Plitkalar bir xil bo‘lgan fasadlar sement aralashma ostida qolishi mumkin.

Xalq deputatlari kengashining Toshkent shahar hokimi (u kengash rahbari ham hisoblanadi — “Daryo” izohi) tomonidan imzolangan qarorida Furqat, Bobur va boshqa ko‘chalar bo‘ylab joylashgan uylarning fasadini ta’mirlash, shuningdek, ko‘chalarni rekonstruksiya qilish va piyodalar yo‘laklarini yaratish nazarda tutilgan.

Hujjatda ta’mirlash qanday amalga oshirilishi, qanday materiallardan foydalanish va qanday sifatga ega bo‘lishi kerakligi to‘g‘risida aniq talablar keltirilmagan. Loyiha hujjatlari buyurtmachi — poytaxt hokimligining “Yagona buyurtmachi xizmati” injiniring kompaniyasi tomonidan tayyorlanib, qurilish sohasida nazorat bo‘yicha hududiy inspeksiyada ro‘yxatdan o‘tkazilishi kerak edi.

Qayd etilishicha, ta’mirlash ishlari piyodalarning xavfsiz harakatlanishi uchun sharoit yaratilmasdan amalga oshirilmoqda. Piyodalar avtomobil yo‘li bo‘ylab yurishga majbur bo‘lmoqda.

Eslatib o‘tamiz, 2019-yilda Chilonzor tumanidagi uylardan birida belaruslik quruvchilar tomonidan yaratilgan mozaika bo‘yalgani haqida tarqalgan xabarlardan so‘ng Toshkent shahar hokimligi tomonidan uni tiklash chorasi ko‘rilgandi. Undan bir yil avval Toshkent shahri hokimligi huzuridagi Jamoatchilik kengashi Parkent Plaza jamoasi bilan birgalikda Yunusobod tumanidagi uylarning birida bo‘yoq surilgan mozaikani to‘g‘rilash va qayta tiklash ishlarini amalga oshirgandi.