Тошкентда мозаикаларни тозалаш бошланди. Уларни барибир бўяб ташлаш режада бўлган

Тошкентнинг Чилонзор туманидаги «Катта Олмазор» маҳалласида жойлашган 14-уйнинг фасадидаги цемент аралашмани кўчириб ташлаш бошланди, деб хабар беради «Gazeta.uz».

Аввалроқ ижтимоий тармоқларда «Катта Олмазор» маҳалласида жойлашган кўп қаватли уйларнинг фасад қисмидаги безакли кафелларнинг усти бўялаётгани тўғрисида хабарлар тарқалганди. Туман ҳокимлиги ҳолатга муносабат билдириб, мозаикаларни бўяш ишлари тўхтатилганини билдирганди. Тошкент шаҳар ҳокимлиги мозаикалар бўяб ташланмаётгани, аксинча, уларни сақлаб қолувчи махсус қоплама сурилаётганини маълум қилганди.

«Материал қум-оқим усули билан ювилади ва мозаика тасвирлари пойтахтимиз аҳолиси кўзи олдида ўзининг бошланғич, бироқ энди мустаҳкамроқ кўринишида намоён бўлади», — дейди ҳокимлик Халқ депутатлари Тошкент шаҳар кенгашини маданий меросни йўқ қилинишига эътиборсизликда айблаган блогерни танқид қилиб.

Мозаика чиндан ҳам цементдан тозалана бошлади. Шунингдек, бунинг учун ҳақиқатан ҳам қум-оқим усули қўлланилмоқда (бу аслида мозаикага жуда ёмон таъсир қилиши мумкин). Бироқ нашрнинг душанба ва чоршанба кунлари ишчилар билан суҳбатида маълум бўлишича, аслида, аввал-бошида ушбу кўчалардаги уйларнинг фасадини кенг кўламли таъмирлаш вақтида мозаикаларни бўяш режалаштирилган бўлган.

Айнан шу мақсадда мозаикага аввал махсус қоплама билан ишлов берилган, кейин эса цемент аралашма билан қопланган ва унинг устига бўёқ қўлланилиши керак бўлган.

Таъкидланишича, ҳафта бошидан бери уйларни цемент аралашма билан қоплаш ишлари тўхтамаётган эди. Ҳозирда ҳам бу ишлар фаол давом этмоқда. Аралашмани панелли уйларнинг фасад қисмлари, бурчаклари ва ички томонларига, шу жумладан мозаик плиткаларга суртилмоқда.

Ишчиларнинг маълум қилишича, ҳозирча уйларнинг фақат декоратив панеллари ўрнатилган бурчакларини цементдан тозалаш режалаштирилган. Битта уй деярли тозаланган, яна биттаси бор. Плиткалар бир хил бўлган фасадлар цемент аралашма остида қолиши мумкин.

Халқ депутатлари кенгашининг Тошкент шаҳар ҳокими (у кенгаш раҳбари ҳам ҳисобланади — «Дарё» изоҳи) томонидан имзоланган қарорида Фурқат, Бобур ва бошқа кўчалар бўйлаб жойлашган уйларнинг фасадини таъмирлаш, шунингдек, кўчаларни реконструкция қилиш ва пиёдалар йўлакларини яратиш назарда тутилган.

Ҳужжатда таъмирлаш қандай амалга оширилиши, қандай материаллардан фойдаланиш ва қандай сифатга эга бўлиши кераклиги тўғрисида аниқ талаблар келтирилмаган. Лойиҳа ҳужжатлари буюртмачи — пойтахт ҳокимлигининг «Ягона буюртмачи хизмати» инжиниринг компанияси томонидан тайёрланиб, қурилиш соҳасида назорат бўйича ҳудудий инспекцияда рўйхатдан ўтказилиши керак эди.

Қайд этилишича, таъмирлаш ишлари пиёдаларнинг хавфсиз ҳаракатланиши учун шароит яратилмасдан амалга оширилмоқда. Пиёдалар автомобиль йўли бўйлаб юришга мажбур бўлмоқда.

Эслатиб ўтамиз, 2019 йилда Чилонзор туманидаги уйлардан бирида беларуслик қурувчилар томонидан яратилган мозаика бўялгани ҳақида тарқалган хабарлардан сўнг Тошкент шаҳар ҳокимлиги томонидан уни тиклаш чораси кўрилганди. Ундан бир йил аввал Тошкент шаҳри ҳокимлиги ҳузуридаги Жамоатчилик кенгаши Parkent Plaza жамоаси билан биргаликда Юнусобод туманидаги уйларнинг бирида бўёқ сурилган мозаикани тўғрилаш ва қайта тиклаш ишларини амалга оширганди.