Toshkentdagi ko‘p qavatli uylardagi mozaikalarga madaniy-tarixiy meros maqomi berilishi mumkin

Toshkent shahar hokimligi huzuridagi Jamoatchilik kengashi ko‘p qavatli uylar yon devorlaridagi mozaikalarga madaniy-tarixiy meros maqomi berishni taklif qilmoqchi.

Bu haqda Toshkent shahar hokimligi huzuridagi Jamoatchilik kengashining 16-iyunda o‘tkazilgan navbatdagi majlisida ma’lum qilingan. Majlisda bir necha masalalar, shu jumladan, ko‘p qavatli uylar yon devorlaridagi mozaikaning ustidan bo‘yalishi masalasi muhokama qilingan.

“Podrobno.uz”ning qayd etishicha, so‘nggi yillarda tuman obodonlashtirish boshqarmalari sovet davridagi ushbu noyob madaniy merosni asta-sekin yo‘q qilmoqda. Aksariyat mozaika pannolari allaqachon yo‘q qilib bo‘lingan yoki ayanchli ahvolda. Shaharda ushbu noyob asarlarni saqlab qolish va qayta tiklash bilan davlat darajasida shug‘ullanadigan mutaxassislar yo‘q.

Poytaxt hokimligi huzuridagi Jamoatchilik kengashi Tarixiy meros departamentiga shahar mozaikasiga madaniy-tarixiy meros maqomini berish taklifini yo‘llashga qaror qilgan.

Eslatib o‘tamiz, 2019-yilda Chilonzor tumanidagi uylardan birida belaruslik quruvchilar tomonidan yaratilgan mozaika bo‘yalgani haqida tarqalgan xabarlardan so‘ng Toshkent shahar hokimligi tomonidan uni tiklash chorasi ko‘rilgandi. Undan bir yil avval Toshkent shahri hokimligi huzuridagi Jamoatchilik kengashi Parkent Plaza jamoasi bilan birgalikda Yunusobod tumanidagi uylarning birida bo‘yoq surilgan mozaikani to‘g‘rilash va qayta tiklash ishlarini amalga oshirgandi.