Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva Toshkentdagi mozaika pannolar tushirilgan binolar egalarini ushbu san’at asarlarini saqlab qolish va ta’mirlashga chaqirdi.

Foto: Telegram / @SaidaMirziyoyeva

“Premier Hall kinoteatri binosini restavratsiya qilish vaqtida rassom Alfred Mazitovning ‘Kokilli qiz’ nomli ajoyib pannosiga duch kelindi. Shahrimizning yorqin, o‘ziga xos jihatlaridan biri, iste’dodli va taniqli rassomlar tomonidan turli davrlarda yaratilgan mozaika pannolardir. Toshkentning monumental san’at yodgorliklari shahrimizni modernizm poytaxti deb atashga asos bo‘la oladi. Aynan ushbu yodgorliklar Toshkentga betakror shahar qiyofasini baxsh etadigan ajoyib bir ramzdir”, — deb yozgan u o‘zining Telegram kanalida.

Foto: Telegram / @SaidaMirziyoyeva

Uning qo‘shimcha qilishicha, Madaniyat va san’atni rivojlantirish jamg‘armasi hamda Grace arxitektura byurosi monumental san’atni saqlab qolish va modernistik arxitekturani zamonaviy megapolis bilan uyg‘unlashtirish bo‘yicha yo‘l xaritasini ishlab chiqishni rejalashtirmoqda.

“Biz mozaika pannolar tushirilgan noyob binolar egalarini ushbu san’at asarlarini saqlab qolish va ta’mirlashga chaqirib qolamiz. Tarixiy merosni asrab-avaylash kelajak avlod oldidagi burchimizdir. Toki g‘animat umrni beparvo o‘tkazganlikda aybdor bo‘lib qolmaylik. Keling, bu bebaho merosni ular uchun asrab qolaylik!”, — deb so‘zlarini yakunlagan Saida Mirziyoyeva.

Jurnalist Nikita Makarenkoning yozishicha, bino egasi — Kinematografiya agentligi direktori Firdavs Abduholiqov panno saqlab qolinishi va restavratsiya qilinishini ma’lum qilgan.

“Hech kim bu ajoyib mozaikani yo‘q qilishga jazm etmasdi! Ayni paytda panno kinoteatrning rejalashtirilgan dizaynini butunlay o‘zgartirmoqda. Endi kinoteatrning nomi ham ushbu ajoyib san’at asari bilan bog‘liq bo‘lishi kerak, deb o‘ylaymiz. Toshkentliklarda takliflar kutib qolamiz”, — degan u.

Agentlik pannoni saqlab qolish uchun binoning dizayni va loyihasini o‘zgartirishga ketadigan har qanday xarajatga tayyor. Uning restavratsiyasi Rassomchilar uyushmasi raisi Akmal Nur bilan muhokama qilingan.

Avvalroq Toshkent shahar hokimligi huzuridagi Jamoatchilik kengashi ko‘p qavatli uylar yon devorlaridagi mozaikalarga madaniy-tarixiy meros maqomi berishni taklif qilmoqchiligi haqida xabar berilgan edi.