Shavkat Mirziyoyev 31-mart kuni makroiqtisodiy barqarorlikni ta’minlash, aholi farovonligini oshirish masalalari yuzasidan o‘tkazilgan videoselektorda valyuta bozorini barqarorlashtirish borasida ko‘rilayotgan choralarni qayd etdi. Bu haqda prezident matbuot kotibi xabar qildi.
Jumladan, valyuta bozori va ayirboshlash kursi barqarorlashdi, birjada rubl va yuan bo‘yicha savdolar boshlangan.
“Bu borada xalqimizda ortiqcha xavotir yoki bezovtalik bo‘lmasligi kerak. Valyuta bozorida keskin tebranishlarning oldini olish uchun zaxiralarimiz yetarli”, — degan prezident.
Markaziy bankka puxta o‘ylangan, og‘ir va vazmin valyuta va monetar siyosatni olib borishni davom ettirish topshirilgan.
Markaziy bankning viloyatlardagi rahbarlari tadbirkorlar bilan har kuni uchrashib, ularga valyuta bozoridagi vaziyatni, eksport-import hisob-kitoblarini amalga oshirish va yangi kredit mexanizmlarini tushuntirib boradi.
Qayd etilishicha, xalqaro ekspertlar jahon iqtisodiyotidagi hozirgi murakkab vaziyat uzoq davom etishini prognoz qilishmoqda. Masalan, so‘nggi bir oyda jahon bozorlarida bug‘doy narxi 36 foizga, shakar xomashyosi 10 foizga, o‘simlik yog‘i narxi 2 barobarga oshgan.
Mavzuga doir:
- Shavkat Mirziyoyev mas’ullarga temiryo‘l tariflari va tannarxini pasaytirish topshirig‘ini berdi
- “Кatta zarar” — Ukrainadagi urush O‘zbekiston iqtisodiyotiga qanday ta’sir qiladi? Mutaxassislar izohi
- YTTB prezidenti Odil Reno-Basso – “Daryo”: “O‘zbekiston yangi vaziyatga tez moslashishni boshladi” (video)
Izoh (0)