Qashqadaryoda Toshkentga olib ketilayotgan iste’molga yaroqsiz 815 kilo go‘sht ko‘mib tashlandi

“Sirdaryo” karantin maskani orqali go‘sht-sut mahsulotlarini, parranda, yirik va mayda shoxli chorva mollarini olib o‘tayotgan avtotransport vositalari viloyat Veterinariya va chorvachilikni rivojlantirish boshqarmasi xodimlari bilan birgalikda tekshirilmoqda. Bu haqda viloyati IIB axborot xizmat xabar berdi.

O‘tkazilgan tadbirlar davomida Qashqadaryo—Toshkent yo‘nalishida harakatlanib ketayotgan Cobalt rusumli avtotransport vositasi xolislar ishtirokida to‘xtatilib tekshirilgan. Ushbu avtotransport vositasini Chiroqchi tumanida yashovchi 42 yoshli fuqaro R.S. tegishli hujjatlarsiz boshqarib ketayotgani aniqlangan. Shuningdek, avtomobil tekshirilganda hech qanday hujjatlarsiz, kelib chiqishi noma’lum bo‘lgan 815 kilogramm hayvon go‘shti borligi ma’lum bo‘lgan.

Ushbu go‘sht mahsulotlari viloyat Hayvonlar kasalliklari tashxisi va oziq-ovqat mahsulotlari xavfsizligi davlat markaziga olib kelinib, laboratoriya tekshiruvlaridan o‘tkazilganda iste’molga yaroqsiz ekani tasdiqlangan.

Go‘sht mahsulotlari viloyat Veterinariya va chorvachilikni rivojlantirish boshqarmasining tegishli xulosasiga asosan ko‘mish yo‘li bilan yo‘q qilingan. R.S. boshqaruvidagi Cobalt rusumli avtotransport vositasi tegishli tartibda qonuniy chora ko‘rish uchun Sirdaryo viloyati IIB JXX YXHB xodimlariga topshirilgan.

Aniqlangan holat yuzasidan Bosh prokuraturasi huzuridagi iqtisodiy jinoyatlarga qarshi kurashish departamentining Sirdaryo viloyati boshqarmasi mas’ul xodimlari tomonidan surishtiruv o‘tkazilmoqda.

Avvalroq Qashqadaryodan Toshkentga olib ketilayotgan 900 kg noma’lum hayvon go‘shti to‘xtatib qolingani to‘g‘risida xabar berilgandi. Ushbu go‘sht mahsulotlarining iste’molga yaroqliligini tekshirish maqsadida muzxonaga vaqtinchalik saqlash uchun joylashtirilgan. Keltirilgan go‘sht namunalari iste’molga yaroqsiz deb topilgan va belgilangan tartibga utilizatsiya qilingan.