Davlat-xususiy sheriklik asosidagi maktabgacha ta’lim tashkilotlari faoliyatini tashkil etish boshqarmasi boshlig‘i Abdug‘ulom Hakimov 31-mart kuni AOKAda bo‘lib o‘tgan matbuot anjumanida bolalarni 2 yoshdan bog‘chaga qabul qilish hamda qamrab olish jarayonlari haqida fikr bildirdi. Bu haqda “Daryo” muxbiri xabar bermoqda.
Prezident farmoni bilan, to‘liq quvvat bilan ishlamayotgan davlat maktabgacha ta’lim tashkilotlariga 2 yoshdan 3 yoshgacha bo‘lgan bolalarni pullik xizmat ko‘rsatish shaklida qabul qilishga ruxsat beriladi.
“To‘liq quvvatda ishlamayotgan bog‘chani qanday qilib aniqlaymiz? Bizda bolalar bog‘chasi tizimi bor. Ushbu tizimda har bir maktabgacha ta’lim tashkilotining quvvati belgilanadi. Unda qancha bola qabul qilingani, ularning qanchasi bormayotgani haqida ma’lumot bor. To‘liq quvvat bilan ishlamayotgan deganda talabga va sanitariya holatiga javob beradigan, jihozlangan, 20 nafar bolagacha qabul qilish imkoni bo‘lgan bo‘sh xonalari bor davlat maktabgacha ta’lim muassasalari haqida gap ketyapti. Xohlagan MTMda ham ushbu xizmatni tashkil qilib bo‘lmaydi. Barcha bog‘cha inventarizatsiyadan o‘tkaziladi, tuman maktabgacha ta’lim bo‘limi vazirlik bilan kelishadi, bo‘sh xonalarda bolalarni qabul qiladi”, — deydi Abdug‘ulom Hakimov.
“Hali qamrab ololmagan qismi ham bor. Ularni imkon darajasida nodavlat MTMlarga borishadi. O‘ta zich bo‘lgan hududlarimiz bor. Masalan, Andijon viloyatida talab ko‘p. Bog‘chaning quvvatiga ham qaraymiz. 7 yoshda bolalar maktabga chiqayotganda bo‘shaydigan o‘rinlarimiz ko‘p bo‘lsa navbat kelish masalasi tezlashadi. Lekin kichkina quvvatda talab yuqori bo‘lsa qiyin bo‘ladi. Shunday bog‘chalarimiz borki, hatto 300-350 nafargacha bolalar navbatda turadi”, — deydi maktabgacha ta’lim vazirligi vakili Abdug‘ulom Hakimov.
Maktabgacha ta’lim vazirligi axborot xizmati rahbari Mavluda Asqarxo‘jayeva ham bolalarni bog‘chalarga qamrovi to‘g‘risida gapirdi.
“Demografik o‘sish degan narsa bor. O‘tgan yilning o‘zida 800 mingdan ortiq bola tug‘ilgan. Maktabgacha ta’lim vazirligi FXDYOlar bilan birgalikda shunday tartib o‘rnatdi – bola tug‘ilganidanoq bog‘chaga navbatga qo‘yiladi. Avvalgi tarixga ham to‘xtalishimiz kerak. 28 yil davomida bizda bog‘chalar soni kamayishi boshlangan, ko‘payish emas. Aholimiz soni 33 millionga chiqqanida ham MTMlarga urg‘u berilmagan. So‘nggi 5 yilda ushbu soha butkul o‘zgardi. Yaqin kelajakda maktabgacha ta’lim rivojlantirish konsepsiyasida 2030-yilgacha bolalar qamrovini 95 foizga chiqarishimiz kerak. Bu raqamlar butun respublika bo‘yicha inobatga olinyapti. 2025-yilgacha 6 yoshli bolalar 100 foiz qamrab olinadi. Chunki ular maktabga tayyorlov guruhlari hisoblanadi.
Shuningdek, ko‘p ota-onalar o‘zlari biror bog‘chani tanlab, unga farzandini navbatga qo‘yishadi. Bu borada bizga ham murojaatlar keladi. Misol uchun, Yunusobod tumanidagi 74-bog‘cha bo‘yicha murojaatlar keladi. Hozir u yerdagi navbatda mingdan oshib ketgan. Ota-onalar o‘zlariga yaqin bog‘chalarga farzandlarini bermay, “u yer sifatsiz” deyishadi. Qayerdan bilishadi? Shuning uchun ota-onalardan ham iltimos qilardik, o‘zlariga yaqin bog‘chalarga farzandlarini bersa. Bundan tashqari, ota-onalar 3 yoshda davlat xizmatlari markaziga farzandini navbatga qo‘ysa ertani o‘zida bog‘chaga chiqadi, deb o‘ylaydi”, — deydi u.
Mavzuga doir:
Izoh (0)