Sirdaryo tumanidagi YPX maskanida Qashqadaryodan Toshkentga olib ketilayotgan noqonuniy go‘sht mahsulotlari to‘xtatib qoldi. Bu haqda “Yoshlar” telekanalining “Yangi davr” dasturida ma’lum qilindi.
YPX maskanida to‘xtatilgan Cobalt avtomobili haydovchisi hujjatlarsiz mashina bosharayotgani aniqlangan. Shuningdek, avtomobil yukxonasi va salon qismida 1,2 tonnadan ortiq go‘sht mahsulotlari borligi ma’lum bo‘lgan. Surishtiruv davomida haydovchi go‘sht unga tegishli ekanini tan olmagan. Mazkur go‘sht mahsulotlari Sirdaryo viloyati veterinariya laboratoriyasiga tekshrish uchun yuborilgan.
Laboratoriya tekshiruvlari davomida go‘sht mahsulotlari iste’molga yaroqsizligi tasdiqlangan. Undan salmonellyoz kuydurgi kasalligiga tekshiruv davomida kasallik tasdiqlanmagan, biroq inson hayoti uchun xavfli bo‘lgan ichak tayoqchalari topilgan.
Go‘sht mahsulotlari viloyat Veterinariya va chorvachilikni rivojlantirish boshqarmasining tegishli xulosasiga asosan yo‘q qilingan. Holat yuzasidan Bosh prokuratura huzuridagi Iqtisodiy jinoyatlarga qarshi kurashish departamentining Sirdaryo viloyati boshqarmasi tomonidan surishtiruv ishlari olib borilmoqda.
Avvalroq Jizzaxda sanitariya qoidalariga zid ravishda olib ketilayotgan 184 kg go‘sht aniqlangani, Qashqadaryoda Cobalt yukxonasidan hujjatsiz 230 kg go‘sht topilgani, Farg‘onada 14,5 tonna go‘shtni ko‘mir ostiga yashirib, Tojikistonga olib o‘tishga uringan shaxslar aniqlangani to‘g‘risida xabar berilgandi.
Izoh (0)