Қашқадарёда Тошкентга олиб кетилаётган истеъмолга яроқсиз 815 кило гўшт кўмиб ташланди

«Сирдарё» карантин маскани орқали гўшт-сут маҳсулотларини, парранда, йирик ва майда шохли чорва молларини олиб ўтаётган автотранспорт воситалари вилоят Ветеринария ва чорвачиликни ривожлантириш бошқармаси ходимлари билан биргаликда текширилмоқда. Бу ҳақда вилояти ИИБ ахборот хизмат хабар берди.

Ўтказилган тадбирлар давомида Қашқадарё—Тошкент йўналишида ҳаракатланиб кетаётган Cobalt русумли автотранспорт воситаси холислар иштирокида тўхтатилиб текширилган. Ушбу автотранспорт воситасини Чироқчи туманида яшовчи 42 ёшли фуқаро Р.С. тегишли ҳужжатларсиз бошқариб кетаётгани аниқланган. Шунингдек, автомобиль текширилганда ҳеч қандай ҳужжатларсиз, келиб чиқиши номаълум бўлган 815 килограмм ҳайвон гўшти борлиги маълум бўлган.

Ушбу гўшт маҳсулотлари вилоят Ҳайвонлар касалликлари ташхиси ва озиқ-овқат маҳсулотлари хавфсизлиги давлат марказига олиб келиниб, лаборатория текширувларидан ўтказилганда истеъмолга яроқсиз экани тасдиқланган.

Гўшт маҳсулотлари вилоят Ветеринария ва чорвачиликни ривожлантириш бошқармасининг тегишли хулосасига асосан кўмиш йўли билан йўқ қилинган. Р.С. бошқарувидаги Cobalt русумли автотранспорт воситаси тегишли тартибда қонуний чора кўриш учун Сирдарё вилояти ИИБ ЖХХ ЙХҲБ ходимларига топширилган.

Аниқланган ҳолат юзасидан Бош прокуратураси ҳузуридаги иқтисодий жиноятларга қарши курашиш департаментининг Сирдарё вилояти бошқармаси масъул ходимлари томонидан суриштирув ўтказилмоқда.

Аввалроқ Қашқадарёдан Тошкентга олиб кетилаётган 900 кг номаълум ҳайвон гўшти тўхтатиб қолингани тўғрисида хабар берилганди. Ушбу гўшт маҳсулотларининг истеъмолга яроқлилигини текшириш мақсадида музхонага вақтинчалик сақлаш учун жойлаштирилган. Келтирилган гўшт намуналари истеъмолга яроқсиз деб топилган ва белгиланган тартибга утилизация қилинган.