FIFA kongressning navbatdagi yig‘ilishida Rossiyaning tashkilotdagi kelajagi masalasini ko‘rib chiqiladi.
Xalqaro futbol federatsiyasi Rossiya futbol ittifoqining a’zoligini to‘xtatib qo‘yish yoki uni tashkilotdan chiqarib yuborish to‘g‘risida qaror qabul qiladi.
“Match TV” xabariga ko‘ra, FIFA prezidenti Janni Infantino, shuningdek, Osiyo va Afrika futbol konfederatsiyalari Rossiyaning a’zoligini to‘xtatish tarafdori. UEFA va KONMEBOL esa Rossiyani FIFA a’zoligidan chiqarib yuborish istagida.
Ikkala jazo o‘rtasidagi farq — federatsiya chetlatilgan taqdirda uni qayta tiklash ancha murakkab jarayondir. Xalqaro o‘yinlar va transferlar taqiqi har ikkala holatda ham qo‘llaniladi.
Ayni damda Rossiya vakillaridan hech biri FIFA kongressida akkreditatsiyadan o‘tmagan.
Avvalroq Rossiya Yevro—2028 va Yevro—2032 mezbonligi uchun ariza topshirgani, UEFA esa bunga rad javobi berish choralarini qidirayotgani xabar qilingandi.
Bungacha Xalqaro boks assotsiatsiyasi (IBA) rossiyalik va belarusliklar bokschilarga xalqaro musobaqalarda qatnashishni taqiqlagandi, Butunjahon boks tashkiloti (WBO), Xalqaro boks federatsiyasi (IBF), Butunjahon boks kengashi (WBC), Butunjahon boks assotsiatsiyasi (WBA) Ukrainadagi vaziyat tufayli Rossiyadagi janglarni tan olmasligini ma’lum qilgandi. FIFA Rossiya futbol terma jamoasini JCh—2022 o‘tish o‘yinlaridan, UEFA esa rus klublarini Yevrokuboklardan chetlatgan edi.
Izoh (0)