ФИФА конгресснинг навбатдаги йиғилишида Россиянинг ташкилотдаги келажаги масаласини кўриб чиқилади.
Халқаро футбол федерацияси Россия футбол иттифоқининг аъзолигини тўхтатиб қўйиш ёки уни ташкилотдан чиқариб юбориш тўғрисида қарор қабул қилади.
«Матч ТВ» хабарига кўра, ФИФА президенти Жанни Инфантино, шунингдек, Осиё ва Африка футбол конфедерациялари Россиянинг аъзолигини тўхтатиш тарафдори. УЕФА ва KONMEBOL эса Россияни ФИФА аъзолигидан чиқариб юбориш истагида.
Иккала жазо ўртасидаги фарқ — федерация четлатилган тақдирда уни қайта тиклаш анча мураккаб жараёндир. Халқаро ўйинлар ва трансферлар тақиқи ҳар иккала ҳолатда ҳам қўлланилади.
Айни дамда Россия вакилларидан ҳеч бири ФИФА конгрессида аккредитациядан ўтмаган.
Аввалроқ Россия Евро—2028 ва Евро—2032 мезбонлиги учун ариза топширгани, УЕФА эса бунга рад жавоби бериш чораларини қидираётгани хабар қилинганди.
Бунгача Халқаро бокс ассоциацияси (IBА) россиялик ва беларусликлар боксчиларга халқаро мусобақаларда қатнашишни тақиқлаганди, Бутунжаҳон бокс ташкилоти (WBO), Халқаро бокс федерацияси (IBF), Бутунжаҳон бокс кенгаши (WBC), Бутунжаҳон бокс ассоциацияси (WBA) Украинадаги вазият туфайли Россиядаги жангларни тан олмаслигини маълум қилганди. ФИФА Россия футбол терма жамоасини ЖЧ—2022 ўтиш ўйинларидан, УЕФА эса рус клубларини Еврокубоклардан четлатган эди.
Изоҳ (0)