“OKMK” klubi yarim himoyachisi Sanjar Tursunov Offside ko‘rsatuvida bo‘lib o‘tgan suhbatda o‘zbekistonlik futbolchilarning mashg‘ulotdan keyin tiklanish jarayoniga yaxshi e’tibor qaratilmasligi haqida gapirdi.
Tursunovning aytishicha, o‘zbekistonlik futbolchilarga ham og‘ir yuklamali mashqlarni berish mumkin, biroq bu mashg‘ulotlar tiklanish jarayonisiz befoyda bo‘lib qoladi.
“Bizda ham boshqa ligalarda bo‘lgani kabi mashg‘ulotlarda yuklamalarni ko‘proq bersa bo‘ladi, biroq mashg‘ulotdan keyin tiklanish jarayoni bor. Bu tizim O‘zbekistonda yo‘q. Mashg‘ulotdan keyin iste’mol qilinadigan vitaminlar, kiyiladigan maxsus kiyimlar va boshqa vositalar bor, biroq bizda bunday narsalar yo‘q, nol.
Biznikilarga ham ‘Atletiko Madrid’ klubi foydalanadigan og‘ir mashg‘ulotlarni bersa bo‘ladi. Bilsangiz, ular mashg‘ulotda hushidan ketib qolish darajasida charchaydi, biroq undan keyin tiklanish jarayonini o‘tab, keyingi o‘yinga tayyor holatda bo‘ladi. Bizda-chi? Mashg‘ulotdan keyingi yuklama bilan keyingi mashg‘ulotga boramiz. Yuklama, yana yuklama, oxirida jarohat. Birinchi navbatda bizga sharoit qilib qo‘yishlari kerak, keyin natijani talab qilish lozim”, — deydi Tursunov.
Futbolchi ushbu holat bo‘yicha O‘zbekiston oliy divizioni klublari va Janubiy Koreyaning 3-4 divizion jamoalarini o‘zaro solishtirdi.
“Janubiy Koreyaning ikkinchi divizionida to‘p surganman. Mayli, ikkinchi divizionini qo‘ya turaylik, uchinchi divizion, uni ham aytmay, undan ham quyi ligada to‘p suradigan oliygoh klublari bor. O‘sha jamoalardagi tashkilotchilik bizning Superliga klublaridagidan yaxshiroq.
Men harakat qilgan jamoada tiklanish jarayonini o‘tash uchun bir xona bo‘lardi, uning ichida jarayonda yordam beradigan barcha narsa bor edi. Bunaqasi bizdagi birorta Superliga klubi tugul, milliy terma jamoada ham yo‘q”, — deydi o‘zbekistonlik futbolchi.
Sanjar Tursunov 2018—2019-yillar davomida Janubiy Koreyaning “Tejon Sitizen” klubida to‘p surgan. 35 yoshli futbolchi, shuningdek, O‘zbekistonning “Paxtakor”, “Lokomotiv”, “Bunyodkor”, Rossiyaning “Volga”, “Alaniya”, “Gazovik”, Ukrainaning “Vorskla”, Qatarning “Um-Salal”, “Al-Haritiyat” va boshqa qator klublarda harakat qilgan. Shuningdek, Tursunov 2010—2018-yillar davomida O‘zbekiston milliy terma jamoasida harakat qilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)