“Real” hujumkor yarim himoyachisi Eden Azar mavsum so‘ngiga qadar safdan chiqdi.
O‘tgan haftada 31 yoshli futbolchi o‘ng oyog‘i kichik boldir suyagidagi osteosintez plastinasini olib tashlash uchun jarrohlik stoliga yotishi ma’lum bo‘ldi. Operatsiyadan so‘ng Azar besh hafta maydonga tusha olmasligi aytilgandi. El Chiringuito jurnalisti Xose Luis Sanchesning ta’kidlashicha, belgiyalik futbolchi uchun mavsum yakunlangan.
Eden “Real” safida jarohat tufayli umumiy hisobda 500 kun maydonga tusha olmadi. Shu vaqt mobaynida belgiyalik 14 marta jarohat olgan.
Avvalroq, “Real” yozda deyarli 10 nafar futbolchisi bilan xayrlashmoqchi ekanligi, ularning orasida Eden Azar ham borligi xabar qilingandi.
“Real” Azarni 2019-yilning yozida “Chelsi”dan sotib olgandi. Madridliklar ushbu transferga 100 million yevrodan ortiq mablag‘ sarflagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)