Chempionlar Ligasida ishtirokchilarni tanlash tamoyili bo‘yicha o‘zgarishlar bo‘lishi mumkin.
The Guardian xabariga ko‘ra, UEFA reytingida yuqori o‘rinlarda bo‘lgan ikki jamoa ham nufuzli musobaqaga yo‘l oladi. Yevropa klublar assotsiatsiyasi a’zolari yangicha yondashuvni qo‘llab-quvvatlamoqda.
Bunda o‘z milliy chempionatida Chempionlar Ligasiga yo‘llanma beradigan o‘rinni qo‘lga kirita olmagan jamoalar UEFA reytingi bo‘yicha litsenziyaga ega bo‘ladi. Biroq bu jamoa darajasi pastroq Yevrokuboklarga (Yevropa Ligasi, Konferensiyalar Ligasi) yo‘llanma beruvchi o‘rinni egallagan bo‘lishi yoki mamlakat Kubogini qo‘lga kiritgan bo‘lishi kerak. Ularning so‘nggi besh mavsumdagi ko‘rsatkichlari inobatga olinadi. Reyting shu tarzda hisoblanadi.
Bu qanday ishlaydi?
Barchasi oddiy: klublarning UEFA reytingidagi so‘nggi besh mavsumda jamg‘argan “yevroochko”lariga qarash kerak bo‘ladi. O‘tgan mavsum natijalariga ko‘ra Chempionlar Ligasi guruh bosqichiga chiqa olmagan reytingning eng yaxshi ikki jamoasi guruh bosqichi uchun yo‘llanmani qo‘lga kiritadi.Bu nega kerak? UEFA o‘z milliy chempionatida omadsizlikka uchragan top-jamoalarning nufuzli musobaqada ishtiroksiz qolishini xohlamayapti. Shu bilan birga mamlakat chempionatida o‘ninchi o‘rin va undan pastdagi o‘rinlarda joylashgan jamoalarning yo‘llanma uchun kurashishi imkonsiz bo‘ladi — yangi reglamentga ko‘ra, hech bo‘lmaganda Yevropa Ligasi yoki Konferensiyalar Ligasiga yo‘llanma beruvchi o‘rinlarda chempionatni yakunlagan yoki mamlakat Kubogini qo‘lga kiritgan jamoalarda imkoniyat bo‘ladi.
Bu kimlarga yordam beradi?
Hozircha aniq emas, ammo jamoalarning ayni vaqtdagi o‘rniga qarab, tasavvur hosil qilish mumkin. Top-5 ligalardagi Chempionlar Ligasi yo‘llanmasidan uzoqda bo‘lib turgan jamoalarni o‘rganib chiqish mumkin.Yo‘llanmalardan biri albatta “Manchester Yunayted”ga (hozirda APLda 6-o‘rinda) berilgan bo‘lardi. Ralf Rangnik jamoasi UEFA reytingida 9-o‘rinni egallab turibdi va qolgan ta’qibchilaridan ancha o‘zib ketgan.
“Roma” va “Tottenhem” 20 ochko ortda. Ularning ortidan “Atalanta” bormoqda. “Lion” reytingda “Atalanta”dan yuqorida turgan bo‘lsa ham, yangi qoida bo‘yicha yo‘llanma uchun kurash olib borolmaydi. Chunki fransuz klubi milliy chempionatda 10-o‘rinni egallab turibdi.
UEFA Yevrokuboklar reglamentini o‘zgartirgan edi
UEFA Yevrokuboklarga 2024-yildan boshlab amalga kiritiladigan o‘zgarishlarni e’lon qilgandi.Unga ko‘ra, Chempionlar Ligasida hozirgidek 32 emas, 36 ta klub ishtirok etadi. Guruh bosqichi o‘rnida bitta liga tashkil etiladi. Ligada dastlabki 8 o‘rinni egallagan jamoa pley-off bosqichiga yo‘l oladi. Qolganlar esa qo‘shimcha pley-off orqali saralanadi. Barcha klublar kamida 10 tadan o‘yin o‘tkazadi va shunga yarasha daromadlar oshadi.
Qo‘shimcha o‘rinlardan biriga UEFA reytingida beshinchi o‘rinni egallab turgan liganing uchinchi jamoasi ega chiqadi. Yana bitta yo‘llanma esa Chempionlar yo‘li saralash bosqichidan muvaffaqiyatli o‘tgan milliy chempionat g‘oliblaridan biriga nasib etadi. Ya’ni bunday yo‘llanmalar soni to‘rttadan beshtaga ko‘payadi.
So‘nggi ikkita yo‘llanma esa yuqorida ta’kidlanganidek, Yevropa Ligasi yoki Konferensiyalar Ligasiga yo‘llanma beruvchi o‘rinni egallagan yoki mamlakat Kubogida zafar quchgan, so‘nggi besh yildagi natijalari bo‘yicha UEFA klublar reytingida eng yuqori o‘rinda turgan ikkita jamoaga nasib etadi.
Reglamentni o‘zgartirish masalasi allaqachon maxsus ishchi guruh tomonidan muhokama qilingan va kelgusi hafta UEFA bosh assambleyasida bu mavzu ko‘tarilishi mumkin.
Izoh (0)