“Binolardagi tasvirlar ustidan bo‘yab tashlanayotgani yo‘q”. Toshkent shahar hokimligi ko‘p qavatli uylardagi mozaikalar bo‘yicha izoh berdi

Ijtimoiy tarmoqlarda Chilonzor tumanidagi “Katta Olmazor” mahallasida joylashgan ko‘p qavatli uylarning fasad qismidagi bezakli kafellarning usti bo‘yalayotgani to‘g‘risida xabarlar tarqalgandi. Tuman hokimligi holatga munosabat bildirib, mozaikalarni bo‘yash ishlari to‘xtatilganini bildirgandi. Toshkent shahar hokimligining ma’lum qilishicha, mozaikalar bo‘yab tashlanayotgani yo‘q, aksincha, ularni saqlab qoluvchi maxsus qoplama surilmoqda.

“Binolardagi tasvirlar ustidan bo‘yab tashlanayotgani yo‘q, aksincha mutaxassis bergan tushuntirishga ko‘ra, ko‘p qavatli uylar devoridagi mozaikalar shahrimizning diqqatga sazovor jihatini saqlab qolishga qaratilgan maxsus material bilan qoplanmoqda”, — deyiladi izohda.

Ishlar to‘liq yakuniga yetganidan so‘ng material qum-oqim usuli bilan yuviladi va mozaika tasvirlari o‘zining boshlang‘ich, biroq endi mustahkamroq ko‘rinishida namoyon bo‘ladi.

Xalq deputatlari Toshkent shahar Kengashining mazkur obodonlashtirish ishlari to‘g‘risidagi qarori matni bilan ushbu havola orqali tanishish mumkin.

Avvalroq Madaniy meros agentligi ham holatga munosabat bildirib, agentlik mutaxassislari respublikadagi mahobatli bezak san’atining namunalarini saqlab qolish maqsadida o‘rganish ishlari olib borayotganini ma’lum qilgandi. “Mozaikalar madaniy meros obyektlari ro‘yxatiga kiritilgach, Ilmiy-ekspert kengashi xulosasiga asosan san’at asarlariga yetkazilgan zarar uchun qonunchilikda belgilangan tartibda chora ko‘riladi”, — deyiladi Madaniy meros agentligi munosabatida.

Eslatib o‘tamiz, 2019-yilda Chilonzor tumanidagi uylardan birida belaruslik quruvchilar tomonidan yaratilgan mozaika bo‘yalgani haqida tarqalgan xabarlardan so‘ng Toshkent shahar hokimligi tomonidan uni tiklash chorasi ko‘rilgandi. Undan bir yil avval Toshkent shahri hokimligi huzuridagi Jamoatchilik kengashi Parkent Plaza jamoasi bilan birgalikda Yunusobod tumanidagi uylarning birida bo‘yoq surilgan mozaikani to‘g‘rilash va qayta tiklash ishlarini amalga oshirgandi.