Xorazm viloyat bandlik bosh boshqarmasi boshlig‘i vazifasida ishlab kelgan Odilbek Ortiqov Shovot tumani hokimi etib tayinlandi. Bu haqda viloyat hokimligi matbuot xizmati xabar berdi.
Ma’lum qilinishicha, 29-mart kuni Xalq deputatlari Shovot tuman kengashining navbatdan tashqari 55-sessiyasi bo‘lib o‘tgan. Sessiyada Shovot tumani hokimi vazifasida ishlab kelgan Hakimboy Otaxonov o‘z arizasiga binoan egallab turgan lavozimidan ozod qilingan.
Xorazm viloyati bandlik bosh boshqarmasi boshlig‘i vazifasida ishlab kelgan Odilbek Ortiqov esa Shovot tumani hokimi lavozimiga tasdiqlangan.
Shuningdek, sessiyada Shovot tumanini 2022-yilda ijtimoiy-iqtisodiy rivojlantirish va aholi turmush sharoitini yaxshilash bo‘yicha ishlab chiqilgan “yo‘l xaritasi”ning taqdimoti o‘tkazilgan. Sessiya ishida Xorazm viloyati hokimi Farhod Ermanov qatnashgan va so‘zga chiqqan.
Eslatib o‘tamiz, 2021-yilning dekabrida Shovot tumani hokimi Hakimjon Otaxonov jarrohlik amaliyotini boshdan o‘tkazgani ma’lum bo‘lgandi. Tuman hokimi matbuot kotibi Mehribon Iskandarova “Daryo”ga Hakimjon Otaxonov suyak yemirilishi bo‘yicha jarrohlik amaliyotini boshdan o‘tkazganini tasdiqlagandi.
Avvalroq Samarqandning Nurobod tumaniga yangi hokim, Xorazm viloyati hokimiga yangi o‘rinbosar tayinlangan edi.
Izoh (0)