Mart oyining so‘nggi kunlari o‘tayotgan bo‘lishiga qaramasdan, Qashqadaryo hamda Jizzax viloyatlarida qor yog‘di. Bu haqda “Daryo” o‘quvchilari xabar berdi.
Ma’lumot berilishicha, Qashqadaryoning Shahrisabz tumanidagi G‘elon hamda Ko‘l qishloqlarida, Kitob tumani hududidan o‘tuvchi Taxtaqoracha dovonida qor yog‘gan.
Shuningdek, Jizzax viloyatining Baxmal tumanidagi Temirqadam hamda O‘smat shaharchasi hududini ham oppoq qor qoplagan.
“Ertalab boshlangan qor hali ham yog‘moqda. Yerlar oqarib qoldi”, — deydi qor yog‘ayotgani haqida xabar bergan “Daryo” o‘quvchisi.
Eslatib o‘tamiz, respublika Gidrometeorologiya markazi 29-mart, seshanba kungi ob-havo haqida ma’lumot berib, Jizzax hamda Qashqadaryo viloyatlarida havo o‘zgarib turishini, ba’zi joylarda biroz yomg‘ir yog‘ib, tuman tushishi mumkinligini ma’lum qilgandi.
Izoh (0)