“O‘zgidromet” aprelda qanday ob-havo kutilayotganini ma’lum qildi

“O‘zgidromet” sinoptiklari 2022-yilning aprel oyida kutilayotgan ob-havo prognozini e’lon qildi.

Qayd etilishicha, ushbu oy asosan quruq va iliq ob-havo bilan boshlanadi. Oyning birinchi haftasida kunduzgi harorat 17-22 darajadan 23-28 darajagacha, janubda ba’zi joylarda 30-33 darajagacha ko‘tariladi. Faqat 2-aprel kunning ikkinchi yarmida Toshkent, Jizzax, Sirdaryo viloyatlarining ayrim joylarida va Farg‘ona vodiysining tog‘oldi va tog‘li hududlarida qisqa muddatli momaqaldiroq yomg‘iri yog‘ishi mumkin.

Keyinchalik, prognozlarga ko‘ra, aprel oyi harorat tartibi bo‘yicha o‘rtacha ko‘p yillik qiymatlarga yaqin bo‘lishi kutilmoqda. Havo harorati kechalari 3-8 daraja iliqdan 10-15 daraja iliqqacha, kunduz kunlari 13-18 daraja iliqdan 23-28 daraja iliqqacha, respublika janubida 30-33 daraja iliqqacha o‘zgarib turadi.

Oyning ayrim kunlarida momaqaldiroq bilan qisqa muddatli yomg‘ir yog‘ishi kutilmoqda. Ba’zi joylarda do‘l yog‘ishi ehtimoli mavjud.

Eslatib o‘tamiz, O‘zbekistonning tog‘li hududlarida aprelgacha qor ko‘chish xavfi e’lon qilingan. 30-martdan 1-aprelgacha O‘zbekiston bo‘yicha yog‘ingarchilik kutilmaydi.