«Бинолардаги тасвирлар устидан бўяб ташланаётгани йўқ». Тошкент шаҳар ҳокимлиги кўп қаватли уйлардаги мозаикалар бўйича изоҳ берди

Ижтимоий тармоқларда Чилонзор туманидаги «Катта Олмазор» маҳалласида жойлашган кўп қаватли уйларнинг фасад қисмидаги безакли кафелларнинг усти бўялаётгани тўғрисида хабарлар тарқалганди. Туман ҳокимлиги ҳолатга муносабат билдириб, мозаикаларни бўяш ишлари тўхтатилганини билдирганди. Тошкент шаҳар ҳокимлигининг маълум қилишича, мозаикалар бўяб ташланаётгани йўқ, аксинча, уларни сақлаб қолувчи махсус қоплама сурилмоқда.

«Бинолардаги тасвирлар устидан бўяб ташланаётгани йўқ, аксинча мутахассис берган тушунтиришга кўра, кўп қаватли уйлар деворидаги мозаикалар шаҳримизнинг диққатга сазовор жиҳатини сақлаб қолишга қаратилган махсус материал билан қопланмоқда», — дейилади изоҳда.

Ишлар тўлиқ якунига етганидан сўнг материал қум-оқим усули билан ювилади ва мозаика тасвирлари ўзининг бошланғич, бироқ энди мустаҳкамроқ кўринишида намоён бўлади.

Халқ депутатлари Тошкент шаҳар Кенгашининг мазкур ободонлаштириш ишлари тўғрисидаги қарори матни билан ушбу ҳавола орқали танишиш мумкин.

Аввалроқ Маданий мерос агентлиги ҳам ҳолатга муносабат билдириб, агентлик мутахассислари республикадаги маҳобатли безак санъатининг намуналарини сақлаб қолиш мақсадида ўрганиш ишлари олиб бораётганини маълум қилганди. «Мозаикалар маданий мерос объектлари рўйхатига киритилгач, Илмий-эксперт кенгаши хулосасига асосан санъат асарларига етказилган зарар учун қонунчиликда белгиланган тартибда чора кўрилади», — дейилади Маданий мерос агентлиги муносабатида.

Эслатиб ўтамиз, 2019 йилда Чилонзор туманидаги уйлардан бирида беларуслик қурувчилар томонидан яратилган мозаика бўялгани ҳақида тарқалган хабарлардан сўнг Тошкент шаҳар ҳокимлиги томонидан уни тиклаш чораси кўрилганди. Ундан бир йил аввал Тошкент шаҳри ҳокимлиги ҳузуридаги Жамоатчилик кенгаши Parkent Plaza жамоаси билан биргаликда Юнусобод туманидаги уйларнинг бирида бўёқ сурилган мозаикани тўғрилаш ва қайта тиклаш ишларини амалга оширганди.