Toshkentning Chilonzor tumanidagi “Katta Olmazor” mahallasida joylashgan ko‘p qavatli uylarning fasadidagi bezakli kafellar usti bo‘yalayotgani yuzasidan ijtimoiy tarmoqlarda e’tirozli fikrlar tarqaldi. Holatga Madaniy meros agentligi munosabat bildirdi.
Xususan, Toshkent shahar madaniy meros boshqarmasi tomonidan poytaxt bo‘ylab o‘rganish ishlari natijasida 150 dan ziyod binolarning fasad qismida tarixiy-badiiy ahamiyatga ega mozaikalar aniqlangan va hozirda ularni davlat himoyasiga olish ishlari amalga oshirilmoqda. Jumladan, Madaniy meros agentligi Ilmiy-ekspert kengashiga Toshkent shahridagi ko‘p qavatli binolardagi mahobatli san’at asarlarini madaniy meros obyektlari sifatida belgilash uchun loyihalar kiritilgan bo‘lib, olimlar tomonidan o‘rganilmoqda.
“Ta’kidlash lozim, mozaikalar madaniy meros obyektlari ro‘yxatiga kiritilgach, Ilmiy-ekspert kengashi xulosasiga asosan san’at asarlariga yetkazilgan zarar uchun qonunchilikda belgilangan tartibda chora ko‘riladi”, — deyiladi Madaniy meros agentligi munosabatida.
Bundan avval Chilonzor tumani hokimligi Katta Olmazor” mahallasida joylashgan ko‘p qavatli uylarning qurilganiga 40 yildan oshgani sababli fasadlardagi mozaikalar ham ta’mirtalab ahvolga kelib qolganini, shu sababli Xalq deputatlari Toshkent shahar kengashi tomonidan qabul qilingan qaror asosida ushbu uylarning fasadlarida ta’mirlash ishlari boshlanganini ma’lum qilgandi. Lekin shu yerda yashovchilarning ayrimlarida ta’mirlash ishlariga e’tiroz bo‘lgani sababli uylarning yon qismidagi kafelli mozaikalarni bo‘yash ishlari to‘xtatilgan.
Toshkent shahar hokimligi huzuridagi Jamoatchilik kengashining 2021-yilning iyunida o‘tkazgan yig‘ilishida ham ko‘p qavatli uylar yon devorlaridagi mozaikaning ustidan bo‘yalishi masalasi muhokama qilingandi. O‘shanda Jamoatchilik kengashi Tarixiy meros departamentiga shahar mozaikasiga madaniy-tarixiy meros maqomini berish taklifini yo‘llashga qaror qilgandi.
Eslatib o‘tamiz, 2019-yilda Chilonzor tumanidagi uylardan birida belaruslik quruvchilar tomonidan yaratilgan mozaika bo‘yalgani haqida tarqalgan xabarlardan so‘ng Toshkent shahar hokimligi tomonidan uni tiklash chorasi ko‘rilgandi. Undan bir yil avval Toshkent shahri hokimligi huzuridagi Jamoatchilik kengashi Parkent Plaza jamoasi bilan birgalikda Yunusobod tumanidagi uylarning birida bo‘yoq surilgan mozaikani to‘g‘rilash va qayta tiklash ishlarini amalga oshirgandi.
Izoh (0)