Andijon viloyatida 2022-yilning birinchi choragida 12 ta holatda is gazi va havo-gaz aralashmasi chaqnashi bilan bog‘liq noxush holat qayd qilingan. Oqibatda 9 nafar fuqaro vafot etgan, 16 nafar fuqaro esa jabrlangan. Bu haqda viloyat Favqulodda vaziyatlar boshqarmasi mas’ullari bilan bo‘lgan matbuot anjumanida ma’lum qilindi, deya xabar bermoqda “Daryo” muxbiri.
Favqulodda vaziyatlar boshqarmasi bo‘limi boshlig‘i, mayor Odiljon Qo‘ldoshevning ta’kidlashicha, 2022-yilning o‘tgan davri mobaynida to‘rtta is gazi va sakkizta havo-gaz aralashmasi chaqnashi bilan bog‘liq noxush holat qayd qilingan.
Qo‘shimcha qilinishicha, uch oy davomida viloyatda 175 ta holatda turli darajadagi yong‘inlar yuz bergan. Oqibatda yetti nafar fuqaro vafot etgan, olti nafar fuqaro esa tan jarohati olgan.
“2021-yilda 852 ta holatda yong‘in sodir bo‘lib, ushbu yong‘inlar oqibatida 19 nafar fuqaro tan jarohati olgan, 13 nafar fuqaro esa vafot etgan. Bundan tashqari, o‘tgan yil davomida 31 ta chaqnash holati kuzatilgan bo‘lib, 58 nafar fuqaro jarohat olgan. Is gazidan zaharlanish holatlarida esa fuqarolarning besh nafari jarohatlangan, bir nafar fuqaro esa bevaqt hayotdan ko‘z yumgan”, — deydi mas’ul.
Matbuot anjumanida aytilishicha, noxush holatlar fuqarolar tomonidan gaz, ko‘mir, o‘tin va boshqa shu kabi yoqilg‘ilardan foydalanishda xavfsizlik choralariga rioya etmasligi, qo‘lbola yasalgan isitish pechlari va anjomlaridan foydalanishi oqibatida kelib chiqmoqda.
Izoh (0)