Qirg‘izistonda diniy-ekstremistik va terroristik guruhlarga qarshi o‘tkazilgan tadbirda “Hizb ut-Tahrir” guruhi yetakchisi qo‘lga olindi. U Qirg‘izistonning janubiy viloyatlarida yashirin ekstremistik tarmoqni tashkillashtirgan, deb xabar beradi “24.kg”.
Qirg‘iziston Davlat xavfsizlik milliy qo‘mitasi ma’lumotlariga ko‘ra, qo‘lga olingan Sh.I. tashkilotning O‘zbekistondagi bo‘linmasi rahbari hisoblanadi. U Qirg‘izistonning janubiy viloyatlari va O‘zbekistonning chegaradosh viloyatlarida faoliyati taqiqlangan tashkilot tuzilmalarini yaratish va mustahkamlash bo‘yicha o‘zining hamfikrlari bilan yashirin faoliyat olib borgan.
Sudgacha bo‘lgan tezkor-surishtiruv tadbirlari davomida ushbu erkak 10 yildan ortiq vaqtdan beri O‘zbekistonda rasman qidiruvda ekani va Qirg‘izistonga yashirinishga uringani aniqlangan. Qirg‘iziston Davlat xavfsizlik milliy qo‘mitasi uni O‘zbekistonga ekstraditsiya qilgan.
Avvalroq Samarqandda “Hizb ut-Tahrir” g‘oyaviy rahnamolaridan birining ko‘rsatmalarini bajarib kelgan shaxs qo‘lga olingani, Toshkent shahri va Toshkent viloyatida ekstremistik tashkilotlarga aloqador 24 nafar shaxs ushlangani to‘g‘risida xabar berilgandi.
Mavzuga doir:
Izoh (0)