Axborot texnologiyalari va kommunikatsiyalarini rivojlantirish vaziri Sherzod Shermatov Belarusning Wargaming kompaniyasi rahbariyati bilan uchrashdi. Bu haqda AKT vazirligi matbuot xizmati xabar berdi.
Ta’kidlanishicha, uchrashuv doirasida tomonlar o‘rtasida qator yo‘nalishlar bo‘yicha hamkorlik qilish masalalariga e’tibor qaratilgan. Shuningdek, Wargaming kompaniyasi vakillari O‘zbekiston IT bozoriga katta qiziqish bildirib, dasturchilar uchun vakolatxonasini ochish masalalari muhokama qilingan.
O‘z navbatida, AKT vazirligi rahbariyati ushbu masalada ko‘mak berishga tayyorligini bildirgan. Vazirlik vakillari, IT Park rezidentlari bo‘lgan xorijiy kompaniyalarga soliq va bojxona imtiyozlari taqdim etilishi, IT-visa tizimi joriy qilingani to‘g‘risida ma’lumot bergan. Mazkur tizim IT mutaxassis va uning oila a’zolari uchun vizalarni tez olish imkon beradi.
Ma’lumot uchun, Wargaming — bu Belarus xususiy kompaniyasi hisoblanib, kompyuter o‘yinlarini yaratish bo‘yicha jahondagi yetakchi kompaniyalardan biri. Kompaniya 15 dan ziyod turli platformalarga mo‘ljallangan o‘yinlarni ishlab chiqqan.
Ular orasida World of Tanks va World of Warplanes kompyuter o‘yinlari eng ommalashgan bo‘lib, ularning auditoriyasi 200 million foydalanuvchidan oshadi.
Kompaniyada hozirda 5000 dan ortiq xodim ishlaydi. Kompaniyaning vakolatxonalari Belarus, Rossiya, Ukraina, Kipr, AQSH, Fransiya, Janubiy Koreya, Avstraliya, Singapur, Yaponiya va Tayvanda joylashgan.
Avvalroq AKT vaziri Sherzod Shermatov O‘zbekistonga ko‘chib o‘tmoqchi bo‘lgan IT-kompaniyalar zarur infratuzilma bilan ta’minlanishini ma’lum qilgandi.
Izoh (0)