Маданий мерос агентлиги Тошкентдаги кўп қаватли уйлар мозаикалари бўяб ташланаётганига муносабат билдирди

Тошкентнинг Чилонзор туманидаги «Катта Олмазор» маҳалласида жойлашган кўп қаватли уйларнинг фасадидаги безакли кафеллар усти бўялаётгани юзасидан ижтимоий тармоқларда эътирозли фикрлар тарқалди. Ҳолатга Маданий мерос агентлиги муносабат билдирди.

Хусусан, Тошкент шаҳар маданий мерос бошқармаси томонидан пойтахт бўйлаб ўрганиш ишлари натижасида 150 дан зиёд биноларнинг фасад қисмида тарихий-бадиий аҳамиятга эга мозаикалар аниқланган ва ҳозирда уларни давлат ҳимоясига олиш ишлари амалга оширилмоқда. Жумладан, Маданий мерос агентлиги Илмий-эксперт кенгашига Тошкент шаҳридаги кўп қаватли бинолардаги маҳобатли санъат асарларини маданий мерос объектлари сифатида белгилаш учун лойиҳалар киритилган бўлиб, олимлар томонидан ўрганилмоқда.

«Таъкидлаш лозим, мозаикалар маданий мерос объектлари рўйхатига киритилгач, Илмий-эксперт кенгаши хулосасига асосан санъат асарларига етказилган зарар учун қонунчиликда белгиланган тартибда чора кўрилади», — дейилади Маданий мерос агентлиги муносабатида.

Бундан аввал Чилонзор тумани ҳокимлиги Катта Олмазор» маҳалласида жойлашган кўп қаватли уйларнинг қурилганига 40 йилдан ошгани сабабли фасадлардаги мозаикалар ҳам таъмирталаб аҳволга келиб қолганини, шу сабабли Халқ депутатлари Тошкент шаҳар кенгаши томонидан қабул қилинган қарор асосида ушбу уйларнинг фасадларида таъмирлаш ишлари бошланганини маълум қилганди. Лекин шу ерда яшовчиларнинг айримларида таъмирлаш ишларига эътироз бўлгани сабабли уйларнинг ён қисмидаги кафелли мозаикаларни бўяш ишлари тўхтатилган.

Тошкент шаҳар ҳокимлиги ҳузуридаги Жамоатчилик кенгашининг 2021 йилнинг июнида ўтказган йиғилишида ҳам кўп қаватли уйлар ён деворларидаги мозаиканинг устидан бўялиши масаласи муҳокама қилинганди. Ўшанда Жамоатчилик кенгаши Тарихий мерос департаментига шаҳар мозаикасига маданий-тарихий мерос мақомини бериш таклифини йўллашга қарор қилганди.

Эслатиб ўтамиз, 2019 йилда Чилонзор туманидаги уйлардан бирида беларуслик қурувчилар томонидан яратилган мозаика бўялгани ҳақида тарқалган хабарлардан сўнг Тошкент шаҳар ҳокимлиги томонидан уни тиклаш чораси кўрилганди. Ундан бир йил аввал Тошкент шаҳри ҳокимлиги ҳузуридаги Жамоатчилик кенгаши Parkent Plaza жамоаси билан биргаликда Юнусобод туманидаги уйларнинг бирида бўёқ сурилган мозаикани тўғрилаш ва қайта тиклаш ишларини амалга оширганди.