“Tolibon” barcha qizlar uchun maktablarni ochish va’dasini bajarmadi

“Tolibon” tomonidan shakllantirilgan hukumatning Ta’lim vazirligi Afg‘onistondagi maktablar boshlang‘ich sinflardan tashqari, barcha o‘quvchi-qizlar uchun yopiqligicha qolishini ma’lum qildi, deb xabar beradi Bakhtar News.

Afg‘onistondagi maktablarda o‘quv jarayonlari 2021-yilning avgustida, hokimiyat tepasiga “Tolibon” kelganidan so‘ng to‘xtatilgandi. Sentabr o‘rtalarida o‘quv jarayonlari faqat o‘g‘il bolalar uchun qayta boshlangan.

Yanvar oyida harakat matbuot kotibi Zabihulla Mujohid “Tolibon” yangi o‘quv yilidan, ya’ni 21-martdan boshlab Afg‘onistondagi barcha maktablarda qizlarning o‘qishiga ruxsat berishni rejalashtirayotganini ma’lum qilgandi. Qizlar 23-martdan o‘qishni boshlashi kerak edi. Biroq Ta’lim vazirligi 23-mrat kuni maktablar qizlar uchun yopiqligicha qolishini bildirdi. Darslarga faqat 6-sinfgacha bo‘lgan qizlarning kelishiga ruxsat beriladi.

Eslatib o‘tamiz, fevral oxirida Afg‘onistondagi barcha davlat universitetlari yigit-qizlar uchun qayta ochilgandi. Qayta ochilgan Kobul davlat universiteti talabalarining aytishicha, “Tolibon” talabiga ko‘ra qizlar va yigitlarga alohida-alohida dars o‘tilmoqda. Kunning bir qismida faqat qizlar, boshqa qismida — o‘g‘il bolalar uchun darslar belgilangan.“Tolibon” mamlakatda yana hokimiyat tepasiga kelgan avgust oyida ayollarga “islom qonunlari doirasida” ishlash, o‘qish va jamiyat boshqaruvida ishtirok etishga ruxsat berilishi aytgan edi. Shu bilan birga, toliblarning shartlariga ko‘ra, Afg‘onistonda ayollarning barchasi hijob (paranji) kiyishi kerak bo‘ladi. “Tolibon” avvalgi boshqaruvi davridan farqli ravishda bu safar ayollarning uydan yolg‘iz, erkaklar hamrohligisiz chiqa olishi mumkinligini kafolatlamoqda.

Keyinchalik Mujohid Afg‘onistondagi ishlaydigan ayollarni o‘z xavfsizligi uchun uydan chiqmaslikka chaqirgandi. “Bizning xavfsizlik kuchlarimizga ayollar bilan qanday munosabatda bo‘lish, ular bilan qanday muloqot qilish haqida o‘rgatilmagan. Mamlakatda to‘liq xavfsizlik o‘rnatilmaguncha ayollardan uyda qolishini so‘raymiz ”, — degan edi harakat vakili.