“Tolibon” harakatining rasmiy vakili Zabihulla Mujohid Afg‘onistonda ayollar huquqlariga shariat qonunlari asosida rioya qilinishiga va’da berdi. Bundan tashqari, Al Arabiya telekanali harakat vakillariga tayanib xabar berishicha, “Tolibon” maktablarda o‘g‘il va qiz bolalar uchun alohida-alohida sinflar joriy etadi.

Foto: “Kommersant”

Afg‘onistonda “Tolibon” hukmronlik qilgan avvalgi davrda (1996–2001) ayollar huquqlari sezilarli darajada cheklangan edi. Ularga pardozdan foydalanish, jamoat joylarida yuzlarini ochib yurish, radio, televizorga chiqish, shuningdek, erkak qarindoshlarisiz biror joyga borish taqiqlangan edi. Ayollarga tashkilotlarda ishlash taqiqlangan, chunki “Tolibon”ning o‘sha paytdagi fikriga ko‘ra, “ayol ish vaqtida erkak hamkasbi bilan jinsiy aloqa qilishi mumkin”.

“Ayollar shariat doirasida yashaydi. Qo‘shni davlatlar va jahon mamlakatlari biz ayollarning huquqlarini tan olmaymiz degan xayolga bormasligi kerak. Biz musulmonmiz, ayollarimiz ham musulmon”, — dedi Zabihulla Mujohid matbuot anjumanida.

Uning qo‘shimcha qilishicha, “hamma mamlakatlarning o‘z qonunlari bor. Afg‘onistonning ham o‘z urf-odatlari va an’analari bor”. “Biz o‘z urf-odatlarimizni hurmat qilamiz. Bizning tinch huquqimiz — mamlakatimizda islom qonunlarini joriy etishdir”, — dedi harakati vakili.

Avvalroq “Tolibon” “ayollar huquqlarini hurmat qilishini” va agar paranji kiysa, ularga ishlashi va o‘qishi uchun ruxsat berishni va’da qilgandi. BMT Xavfsizlik kengashi yangi Afg‘oniston hukumatini ayollar ishtirokida tuzishga chaqirgan.

“Tolibon” vakili Enamulla Samanganiy Afg‘oniston davlat televideniyesidagi chiqishida ayollarni mamlakat rahbariyatiga jalb etish ehtimolini istisno qilmadi.

“Islom Amirligi (‘Tolibon’ Afg‘onistonni shunday ataydi) ayollarning qurbon bo‘lishini xohlamaydi, shariat qonunlariga ko‘ra, ayollar davlat tuzilmalarining bir qismi bo‘lishi kerak”, — dedi u. Shu bilan birga, Samanganiy hukumat tuzilmasi hali to‘liq ma’lum emasligini ta’kidladi. Unga ko‘ra, Afg‘onistonning yangi hukumati tajribaga asoslangan bo‘ladi, lekin u butunlay islomiy rahbariyat bo‘ladi.

“Tolibon”ning Qatardagi vakolatxonasi vakili Suhayil Shohinning BBC’ga aytishicha, ayollar o‘qishni davom ettirishi va normal hayot kechirishi mumkin bo‘ladi, lekin ularga qonun ijodkorligi va sud faoliyatida qatnashishga ruxsat berilishi yoki berilmasligi noma’lum.

BBC xabariga ko‘ra, “Tolibon”ning va’dalari Afg‘onistonning turli hududlaridan kelayotgan xabarlarga zid. Masalan, Qandahorda bankda ishlaydigan ayollarga endi ularning ishlarini erkak qarindoshlari bajarishi aytilgan. Boshqa hududlarda ayollarga mustaqil ravishda ko‘chaga chiqishga ruxsat berilmayapti va ular paranji yopinishga majbur bo‘lmoqda.