Qutqaruvchilar Xitoyda halokatga uchragan Boeing 737 samolyotining ikki qora qutisidan birini topdi, deb yozmoqda Reuters. Xitoy fuqaro aviatsiyasi boshqarmasi (CAAC) vakili Chju Taoning aytishicha, topilgan quti — uchuvchining kabinasidagi ovoz yozish qurilmasi.
Chju Taoning so‘zlariga ko‘ra, qora quti Pekindagi institutga yuborilgan, u yerda qurilmaning shifri ochiladi, jarayon qancha davom etishi unga yetgan zarar darajasiga bog‘liq. Tergovchilar qurilmadan reysning uch uchuvchisi o‘rtasidagi aloqalar haqida batafsil ma’lumot olishga umid qilmoqda. Xitoy rasmiylarining ta’kidlashicha, samolyot yerga tomon tez pastlayotgan vaqtda uchuvchilar aviadispetcherlarning takroriy qo‘ng‘iroqlariga javob bermagan.
Halokat sabablari hozircha aniqlanmagan. Aftidan, zarb bilan yerga urilish oqibatida samolyotning katta qismi parchalanib ketgan — ba’zi vayronalar va inson qoldiqlari topilgan. Omon qolganlar haqida darak yo‘q.
Halokat joyiga olib boradigan yo‘llar hudud aholisi va maxsus ruxsatnomasi borlardan tashqari hamma uchun yopiqligicha qolmoqda. Ayni damda qutqaruvchilar samolyotning ikkinchi qora qutisini qidirmoqda.
Xitoy samolyot halokatini tekshirmoqda, shu bilan birga AQSHni tekshiruvda ishtirok etishga taklif qildi, chunki samolyot Amerikada loyihalashtirilgan va ishlab chiqarilgan.
Eslatib o‘tamiz, 21-mart kuni China Eastern Airlines aviakompaniyasiga tegishli Boeing 737 samolyoti Xitoyning Guansi-Chjuan avtonom tumanidagi Uchjou shtatining Teng tumanida qulab tushdi va o‘rmon yong‘iniga sabab bo‘ldi. Samolyot bortida 132 kishi, jumladan 123 yo‘lovchi va to‘qqiz nafar ekipaj a’zosi bo‘lgan.
Izoh (0)