Fransiya Aerokosmik kuchlari yadro qurolini olib yurishga qodir, yangilangan, o‘rta masofaga o‘chuvchi “havo-yer” raketasini (ASMPA) sinovdan o‘tkazdi. Bu haqda Fransiya Mudofaa vazirligi xabar qildi.
“Fransiya Qurolli kuchlari vaziri Florans Parli 2022-yil 23-mart kuni modernizatsiyalangan yadroviy zaryadsiz ASMPA sinovdan muvaffaqiyatli o‘tganidan katta mamnuniyat izhor etadi”, — deyiladi xabarda.
Fransiyaning Matra BAE Dynamics Alenia (MBDA) kompaniyasi tomonidan ishlab chiqarilgan raketa Dassault Rafale qiruvchi samolyoti tomonidan uchirilgan. Uchirish Fransiya janubi-g‘arbida joylashgan Kazo qishlog‘idagi aerodromda amalga oshirilgan.
“Ushbu muvaffaqiyat yangilangan ASMPA raketasining ishlab chiqarish bosqichiga o‘tganidan dalolat beradi”, — dedi Mudofaa vazirligi. Kelajakda raketani Aerokosmik kuchlarning strategik bo‘linmalari va Fransiya dengiz floti dengiz aviatsiyasi bilan birgalikda foydalanishga topshirish rejalashtirilmoqda.
O‘rta masofaga mo‘ljallangan “havo-yer” yadroviy raketasi (ASMPA) 2009-yilda foydalanishga topshirilgan, u taxminan 2035-yilda yangi avlod “havo-yer” (ASN4G) tizimiga almashtirilishi kerak, deb yozadi Le Figaro.
Fransiya Yevropa Ittifoqida yadro quroliga ega yagona davlatdir. Mamlakat ushbu quroldan yadroviy suv osti kemalarida (SNLE ballistik raketalari) yoki ASMPA bilan qurollangan Rafale samolyotlarida ishlatishi mumkin.
Eslatib o‘tamiz, 2022-yilning fevral oyida Fransiya prezidenti Emmanuel Makron 2050-yilgacha mamlakatda kamida oltita yangi atom elektr stansiyasi (AES) qurish rejasini e’lon qilgandi.
Izoh (0)