«Толибон» барча қизлар учун мактабларни очиш ваъдасини бажармади

«Толибон» томонидан шакллантирилган ҳукуматнинг Таълим вазирлиги Афғонистондаги мактаблар бошланғич синфлардан ташқари, барча ўқувчи-қизлар учун ёпиқлигича қолишини маълум қилди, деб хабар беради Bakhtar News.

Афғонистондаги мактабларда ўқув жараёнлари 2021 йилнинг августида, ҳокимият тепасига «Толибон» келганидан сўнг тўхтатилганди. Сентябрь ўрталарида ўқув жараёнлари фақат ўғил болалар учун қайта бошланган.

Январь ойида ҳаракат матбуот котиби Забиҳулла Мужоҳид «Толибон» янги ўқув йилидан, яъни 21 мартдан бошлаб Афғонистондаги барча мактабларда қизларнинг ўқишига рухсат беришни режалаштираётганини маълум қилганди. Қизлар 23 мартдан ўқишни бошлаши керак эди. Бироқ Таълим вазирлиги 23-мрат куни мактаблар қизлар учун ёпиқлигича қолишини билдирди. Дарсларга фақат 6-синфгача бўлган қизларнинг келишига рухсат берилади.

Эслатиб ўтамиз, февраль охирида Афғонистондаги барча давлат университетлари йигит-қизлар учун қайта очилганди. Қайта очилган Кобул давлат университети талабаларининг айтишича, «Толибон» талабига кўра қизлар ва йигитларга алоҳида-алоҳида дарс ўтилмоқда. Куннинг бир қисмида фақат қизлар, бошқа қисмида — ўғил болалар учун дарслар белгиланган.«Толибон» мамлакатда яна ҳокимият тепасига келган август ойида аёлларга «ислом қонунлари доирасида» ишлаш, ўқиш ва жамият бошқарувида иштирок этишга рухсат берилиши айтган эди. Шу билан бирга, толибларнинг шартларига кўра, Афғонистонда аёлларнинг барчаси ҳижоб (паранжи) кийиши керак бўлади. «Толибон» аввалги бошқаруви давридан фарқли равишда бу сафар аёлларнинг уйдан ёлғиз, эркаклар ҳамроҳлигисиз чиқа олиши мумкинлигини кафолатламоқда.

Кейинчалик Мужоҳид Афғонистондаги ишлайдиган аёлларни ўз хавфсизлиги учун уйдан чиқмасликка чақирганди. «Бизнинг хавфсизлик кучларимизга аёллар билан қандай муносабатда бўлиш, улар билан қандай мулоқот қилиш ҳақида ўргатилмаган. Мамлакатда тўлиқ хавфсизлик ўрнатилмагунча аёллардан уйда қолишини сўраймиз », — деган эди ҳаракат вакили.