Rossiya Xarkov viloyatidagi Izyum shahri egallanganini ma’lum qildi. Viloyat rahbari esa janglar davom etayotganini ta’kidlamoqda

24-mart kuni ertalab Rossiya qo‘shinlari Xarkov viloyatidagi Izyum shahrida to‘liq nazorat ostiga oldi. Bu haqda Rossiya Mudofaa vazirligi rasmiy vakili Igor Konashenkovga tayanib, “Interfaks” xabar berdi.

Idora, shuningdek, o‘tgan kecha Rossiya harbiylari Ukrainaning 60 ta harbiy obyektini, Kiyev yaqinida 13 ta havo hujumidan mudofaa tizimini yo‘q qilgani va ikkita uchuvchisiz boshqariladigan uchish apparati urib tushirilganini ma’lum qildi. Urush boshlanganidan beri Rossiya Qurolli kuchlari tomonidan Ukrainaning 257 ta droni, 202 ta zenit raketa majmualari, 1572 ta tanki va boshqa harbiy mashinalari yo‘q qilingan.

O‘z navabatida viloyat ma’muriyati rahbari Oleg Sinegubovning ta’kidlashicha, Izyum tumanidagi janglar davom etmoqda. “Ruslar yo‘nalishni kuchaytirishga urinayotgan bo‘lsada, Ukraina armiyasi barcha hujumlarni qaytarmoqda, Izyum shahri yaqinida Ukraina Qurolli kuchlari Rossiyaning yana ikkita samolyotini urib tushirdi”, — deydi u.

Izyum—Xarkov viloyatidagi kattaligi bo‘yicha uchinchi shahar. 2020-yil ma’lumotlariga ko‘ra, u yerda 46 ming aholi istiqomat qiladi. Urush davrida Izyum og‘ir yaradorlar olib kelinayotgan shaharlardan biriga aylandi.

15-mart kuni Rossiya kuchlari Ukrainaning Xerson viloyatini to‘liq nazoratga olgan edi. BMT ma’lumotlariga ko‘ra, Ukrainadagi urushda halok bo‘lgan tinch aholi vakillarining soni 925 nafarga yetgan.