BMT Xavfsizlik kengashi Rossiyaning Ukrainadagi gumanitar vaziyat bo‘yicha rezolyutsiyasini qabul qilmadi

BMT Xavfsizlik kengashi Rossiyaning Ukrainadagi gumanitar vaziyat bo‘yicha rezolyutsiyasini qabul qilmadi, deb xabar beradi Anadolu agentligi.

Rossiyaning Ukrainadagi gumanitar vaziyat bo‘yicha rezolyutsiyasiga faqat Xitoy ovoz bergan, Xavfsizlik kengashining qolgan 13 a’zosi betaraf qolgan. Shu sababli Rossiya rezolyutsiyasi kerakli 9 ta ovozni to‘play olmay, rad etilgan.

BMT Xavfsizlik kengashi Ukrainadagi gumanitar vaziyatni ko‘rib chiqish uchun yig‘ilish belgilashga uringan, biroq Rossiya bunga rozi bo‘lmagan va o‘z rezolyutsiyasi loyihasini kiritgan.

Rezolyutsiyada gumanitar vaziyatning yomonlashgani ta’kidlangan, biroq vaziyat Rossiyaning Ukrainaga qarshi bosqinidan so‘ng yuzaga kelgani ko‘rsatilmagan.

Rezolyutsiya qabul qilinishi uchun BMT Xavfsizlik kengashining 5 ta doimiy va 10 ta doimiy bo‘lmagan jami 15 ta a’zosining kamida 9 nafari qo‘llab-quvvatlashi kerak. Shu bilan birga, doimiy a’zolardan hech biri veto huquqidan foydalanmasligi lozim.

BMT Bosh Assambleyasi yaqin kunlarda Rossiyaning Ukrainaga nisbatan tajovuzkorligini qoralovchi rezolyutsiyani muhokamaga taqdim etadi, bu esa Rossiyani diplomatik izolyatsiya qilishni nazarda tutadi.

Avvalroq AQSH prezidenti Jo Bayden Yevropaga jo‘nab ketayotgani, u yerda NATO va G7 yetakchilarining sammitida ishtirok etib, Yevropa Ittifoqi yetakchilari oldida nutq so‘zlashi to‘g‘risida xabar berilgandi. Baydenning safaridan bosh maqsad G‘arbning Ukrainadagi vaziyatga keyingi munosabatini muvofiqlashtirishdir.