“Prezident bilan uchrashuvdan bir hafta o‘tar-o‘tmas meni hokim lavozimiga tayinlashdi”. Hokim yordamchisi lavozimida ishlab Mo‘ynoq hokimi bo‘lgan Baxtiyar Menglibekov haqida

2022-yilning yanvar oyidan boshlab O‘zbekistonda yangi lavozim – hokim yordamchilari 9259 ta mahallada ish faoliyatlarini boshlashdi. Prezident Shavkat Mirziyoyev qaysi hududga bormasin hamisha hokim yordamchilari bilan muloqotda bo‘lyapti. Bu kabi e’tiborning natijasi esa uzoq kuttirmadi — 7-mart kuni xalq deputatlari Mo‘ynoq tumani kengashining 41-sessiyasida Mo‘ynoq tumani “Madeli” mahalla fuqarolar yig‘ini mahallada tadbirkorlikni rivojlantirish, aholi bandligini ta’minlash va kambag‘allikni qisqartish masalalari bo‘yicha hokim yordamchisi lavozimida faoliyat yuritgan Baxtiyar Menglibekov tuman hokimi etib tayinlandi. “Daryo” hokim yordamchisi lavozimi, yangi tayinlangan hokimning rejalari haqida so‘z yuritadi.

Hokim yordamchisi lavozimi qachon va qanday joriy etildi?

Shavkat Mirziyoyev 2021-yilning 11-oktabr kuni qashqadaryolik saylovchilar bilan bo‘lib o‘tgan uchrashuvda kichik tadbirkorlikni rivojlantirish, ishsizlikni kamaytirish va kambag‘allikni qisqartirish uchun hokim yordamchilari lavozimlarini joriy etish taklifini ilgari surgan edi. Davlat rahbari hokim yordamchilari kredit va subsidiya berishi, mahalladagi tomorqa va bo‘sh yerlardan samarali foydalanishi, kooperatsiyalar tashkil qilish bo‘yicha aholiga ko‘maklashishi haqida aytgan edi.

Shuningdek, ularning o‘z budjeti bo‘lib, ehtiyojmand oilalarga subsidiyalar ajratish, jamoat ishlariga jalb qilish, yoshlarni kasbga o‘qitishni tashkil etish huquqlari berilishi ta’kidlangan edi. Imtiyozli kredit va subsidiya oladigan aholi va ishsiz fuqarolar bilan kambag‘allikdan chiqish va ko‘proq daromad olishga undaydigan “ijtimoiy shartnoma” tuzishga hokim yordamchilari mas’ul bo‘ladi.

“Yoshlarni hokim yordamchisi lavozimiga qo‘yishdan oldin 2 oy davomida yangi tizim asosida ishlashga o‘qitamiz, 2-3 yil mahallada ishlab, o‘zini ko‘rsatganlarini kelgusida rahbarlik lavozimlariga qo‘yamiz. Ushbu tizimlar orqali kelgusi besh yilda Kasbi tumanida jami 21 ming nafar aholi doimiy daromad manbasiga ega bo‘ladi”, — degan edi Shavkat Mirziyoyev

2021-yilning noyabr oyida prezident raisligida bo‘lib o‘tgan videoselektor yig‘ilishida 2022-yilning 1-yanvaridan respublikaning 9259 ta mahallasida hokim yordamchilari ish boshlashi ma’lum qilindi.

Prezident 23-noyabr kuni Shayxontohur tumaniga tashrifi davomida yangi tizim asosida mahallalarda tuman hokimi yordamchisi hamda Toshkent shahar hokimining yordamchisi — yoshlar yetakchisi lavozimlarini joriy etish masalasiga alohida e’tibor qaratgandi.

“Dunyoda bunday tajriba ham, kitob ham yo‘q. Buning uchun avvalo fidoyi bo‘lish, xalqni sevish kerak. Bu ikki lavozimda ishlaydiganlar mahallada islohotlar poydevori bo‘ladi. Ular tadbirkorlikni rivojlantirish, ishsizlikni kamaytirish, yoshlarni qo‘llab-quvvatlash bo‘yicha davlat siyosatini amalga oshiradi. Bu juda katta mas’uliyat va sharaf”, — degan edi prezident.

Fevral oyi avvalida prezident raisligida o‘tkazilayotgan ipoteka va qurilish materiallari mavzusidagi videoselektor yig‘ilishda o‘zini yaxshi ko‘rsatgan hokim yordamchilari va respublika vakillari mukofotlanishi, yil natijalari bo‘yicha esa “Yangi O‘zbekiston islohotchisi” ko‘krak nishoniga tavsiya qilinishi, ularga ipoteka asosida kvartira olishda 50 foizgacha subsidiya ajratilishi aytilgandi.

Farg‘ona shahar hokimligi tomonidan 30 ta hokim yordamchisining barchasi alohida xona, kompyuter jamlanmasi bilan ta’minlangan, har biriga dastlabki va qo‘shimcha to‘lovlarsiz yil davomida bo‘lib to‘lash sharti bilan elektroskuterlar berilgan.

Mo‘ynoq tumani hokimi ushbu lavozimgacha bo‘lgan faoliyati, kelajakdagi rejalari haqida

“Daryo” O‘zbekiston tarixida birinchi bor hokim yordamchisi lavozimida ishlab Mo‘ynoq hokimi bo‘lgan Baxtiyar Menglibekov bilan suhbatlashdi.

1984-yili 11-dekabr kuni Mo‘ynoq tumanida tug‘ilganman. 1991-yili tumandagi 11-sonli umumta’lim maktabiga o‘qishga borganman. Maktabni tugatib, Nukus davlat pedagogika institutining tarix va huquqshunoslik fakultetiga o‘qishga topshirganman. Keyin to‘lov kontrakt asosida o‘qishga qabul qilinganman, lekin o‘qishga sharoitim bo‘lmagan. O‘qishga yana tayyorlandim, kelasi yili esa Toshkent davlat texnika universitetining neft-gaz bo‘limiga o‘qishga topshirdim. Mo‘ynoqda aynan shu soha bo‘yicha ishlar boshlanayotgan edi. Ammo unda men umuman kirolmadim. Keyin esa yana turli fanlardan o‘qishga tayyorlanib yurdim, shu bilan birga, ishladim ham. Chunki daromad topib, oilamga yordam berishim kerak edi. 2004-yilda esa o‘z maqsadimga ham erishdim — Nukus davlat pedagogika institutining Milliy istiqlol g‘oyasi va ma’naviyat asoslari fakultetiga o‘qishga kirdim. O‘qish davomida mahallamizdagi “Amudaryo” MCHJ baliqchilik firmasida ishlab keldim. O‘qishni 2008-yili bitirganimda ham o‘sha yerda ishlardim.

2011-yili Mo‘ynoq tumani hokimligiga yetakchi mutaxassis lavozimiga ishga keldim. Ushbu lavozimda 4 yil ishladim, keyin 1 yil davomida bosh mutaxassis lavozimida ishladim. 2017-yilning mart oyidan boshlab tuman hokimning yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishladim. 2022-yilning yanvar oyiga qadar shu lavozimda ishlab keldim, 10-yanvardan boshlab esa yangi tashkil qilingan tuman hokimining yordamchisi lavozimida ish boshladim.

Prezidentimizning Mo‘ynoqqa kelishlari haqida eshitganimizda bunga tayyorgarlik ko‘ra boshladik. Men bunga qadar prezidentning ikki marta yig‘ilishda qatnashgan edim. Dastlab 2018-yili Qoraqalpog‘istonga, jumladan, Mo‘ynoq tumaniga tashrifi davomida, so‘ng 2019-yili tashrif buyurganlarida ishtirok etganman. Bu yilgisida meni hokim yordamchisi sifatida taklif qilishdi. Davlat rahbari yig‘ilish davomida hokim yordamchilariga ham so‘z berdi. Shu vaqtda men ham prezident bilan gaplashish baxtiga muyassar bo‘ldim. Suhbat davomida men o‘z faoliyatim, mahallabay ishlashning afzalliklari, kelajakdagi rejalarimni aniq aytib berdim. Shu uchrashuvdan bir hafta o‘tar-o‘tmas men hokim lavozimiga taklif qilib, tayinlashdi.

Biz Mo‘ynoq tumani rivojlantirishga qaratilgan joriy yildagi “yo‘l xaritasini” ishlab chiqdik. Bunda tadbirkorlik, qishloq xo‘jaligi, turizm, sanoat sohalarni rivojlantirish borasida rejalar o‘rin olgan. Shuningdek, prezidentimiz haftada ikki marta Toshkent—Nukus—Mo‘ynoq yo‘nalishida aviaparvozlarni yo‘lga qo‘yish topshirig‘ini berdi. Navro‘z bayrami arafasida birinchi aviaparvozni amalga oshirishni reja qilyapmiz. Aeroport doimiy ishlasa tumanda yashovchi ko‘pgina fuqarolar ish bilan ta’minlanadi, ularning bandligi ta’minlanadi.

Bundan tashqari, Mo‘ynoq tumaniga Toshkent viloyati biriktirilgan. Ular bilan ham birgalikda ishlayapmiz. Toshkent viloyati hokimligi 200 milliard so‘mdan ortiq biznes loyihalari bilan tumanimizda ishlarni amalga oshiradi. Shu kabi loyihalarni amalga oshirish natijasida 500 dan 1000 nafargacha fuqaroni ish bilan ta’minlash maqsad qilingan.

Mo‘ynoq tumani hokimi Baxtiyar Menglibekov

O‘zbekiston prezidentining davlat xizmati va hokimiyat vakillik organlari bilan hamkorlik qilish masalalari bo‘yicha maslahatchisining birinchi o‘rinbosari Qahramon Quronboyev Mo‘ynoqqa tayinlangan yangi hokim haqida e’lon qilarkan, nomzodning Prezident huzuridagi Davlat xizmatini rivojlantirish agentligi tomonidan Milliy kadrlar zaxiraga olingani aytib o‘tgan edi.

“Faoliyatini samarali olib borayotgan mahalladagi hokim yordamchilari va yoshlar yetakchilarini Milliy kadrlar zaxirasiga kiritish davom etmoqda”, — deb yozgan Qahramon Quronboyev.

Aytish mumkinki, bu hali boshlanishi. Yuqorida hokim yordamchilariga qanday sharoit yaratib berilgan-u, ularning ish faoliyati qay tarzda rag‘batlantirilishi haqida so‘zladik. Qilingan hech bir yaxshi ish davlat tomonidan bee’tibor qolmasligiga yana bir dalil desak, yolg‘on bo‘lmaydi.