«Президент билан учрашувдан бир ҳафта ўтар-ўтмас мени ҳоким лавозимига тайинлашди». Ҳоким ёрдамчиси лавозимида ишлаб Мўйноқ ҳокими бўлган Бахтияр Менглибеков ҳақида

2022 йилнинг январь ойидан бошлаб Ўзбекистонда янги лавозим – ҳоким ёрдамчилари 9259 та маҳаллада иш фаолиятларини бошлашди. Президент Шавкат Мирзиёев қайси ҳудудга бормасин ҳамиша ҳоким ёрдамчилари билан мулоқотда бўляпти. Бу каби эътиборнинг натижаси эса узоқ куттирмади — 7 март куни халқ депутатлари Мўйноқ тумани кенгашининг 41-сессиясида Мўйноқ тумани «Мадели» маҳалла фуқаролар йиғини маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартиш масалалари бўйича ҳоким ёрдамчиси лавозимида фаолият юритган Бахтияр Менглибеков туман ҳокими этиб тайинланди. «Дарё» ҳоким ёрдамчиси лавозими, янги тайинланган ҳокимнинг режалари ҳақида сўз юритади.

Ҳоким ёрдамчиси лавозими қачон ва қандай жорий этилди?

Шавкат Мирзиёев 2021 йилнинг 11 октябрь куни қашқадарёлик сайловчилар билан бўлиб ўтган учрашувда кичик тадбиркорликни ривожлантириш, ишсизликни камайтириш ва камбағалликни қисқартириш учун ҳоким ёрдамчилари лавозимларини жорий этиш таклифини илгари сурган эди. Давлат раҳбари ҳоким ёрдамчилари кредит ва субсидия бериши, маҳалладаги томорқа ва бўш ерлардан самарали фойдаланиши, кооперациялар ташкил қилиш бўйича аҳолига кўмаклашиши ҳақида айтган эди.

Шунингдек, уларнинг ўз бюджети бўлиб, эҳтиёжманд оилаларга субсидиялар ажратиш, жамоат ишларига жалб қилиш, ёшларни касбга ўқитишни ташкил этиш ҳуқуқлари берилиши таъкидланган эди. Имтиёзли кредит ва субсидия оладиган аҳоли ва ишсиз фуқаролар билан камбағалликдан чиқиш ва кўпроқ даромад олишга ундайдиган «ижтимоий шартнома» тузишга ҳоким ёрдамчилари масъул бўлади.

«Ёшларни ҳоким ёрдамчиси лавозимига қўйишдан олдин 2 ой давомида янги тизим асосида ишлашга ўқитамиз, 2-3 йил маҳаллада ишлаб, ўзини кўрсатганларини келгусида раҳбарлик лавозимларига қўямиз. Ушбу тизимлар орқали келгуси беш йилда Касби туманида жами 21 минг нафар аҳоли доимий даромад манбасига эга бўлади», — деган эди Шавкат Мирзиёев

2021 йилнинг ноябрь ойида президент раислигида бўлиб ўтган видеоселектор йиғилишида 2022 йилнинг 1 январидан республиканинг 9259 та маҳалласида ҳоким ёрдамчилари иш бошлаши маълум қилинди.

Президент 23 ноябрь куни Шайхонтоҳур туманига ташрифи давомида янги тизим асосида маҳаллаларда туман ҳокими ёрдамчиси ҳамда Тошкент шаҳар ҳокимининг ёрдамчиси — ёшлар етакчиси лавозимларини жорий этиш масаласига алоҳида эътибор қаратганди.

«Дунёда бундай тажриба ҳам, китоб ҳам йўқ. Бунинг учун аввало фидойи бўлиш, халқни севиш керак. Бу икки лавозимда ишлайдиганлар маҳаллада ислоҳотлар пойдевори бўлади. Улар тадбиркорликни ривожлантириш, ишсизликни камайтириш, ёшларни қўллаб-қувватлаш бўйича давлат сиёсатини амалга оширади. Бу жуда катта масъулият ва шараф», — деган эди президент.

Февраль ойи аввалида президент раислигида ўтказилаётган ипотека ва қурилиш материаллари мавзусидаги видеоселектор йиғилишда ўзини яхши кўрсатган ҳоким ёрдамчилари ва республика вакиллари мукофотланиши, йил натижалари бўйича эса «Янги Ўзбекистон ислоҳотчиси» кўкрак нишонига тавсия қилиниши, уларга ипотека асосида квартира олишда 50 фоизгача субсидия ажратилиши айтилганди.

Фарғона шаҳар ҳокимлиги томонидан 30 та ҳоким ёрдамчисининг барчаси алоҳида хона, компьютер жамланмаси билан таъминланган, ҳар бирига дастлабки ва қўшимча тўловларсиз йил давомида бўлиб тўлаш шарти билан электроскутерлар берилган.

Мўйноқ тумани ҳокими ушбу лавозимгача бўлган фаолияти, келажакдаги режалари ҳақида

«Дарё» Ўзбекистон тарихида биринчи бор ҳоким ёрдамчиси лавозимида ишлаб Мўйноқ ҳокими бўлган Бахтияр Менглибеков билан суҳбатлашди.

1984 йили 11 декабрь куни Мўйноқ туманида туғилганман. 1991 йили тумандаги 11-сонли умумтаълим мактабига ўқишга борганман. Мактабни тугатиб, Нукус давлат педагогика институтининг тарих ва ҳуқуқшунослик факультетига ўқишга топширганман. Кейин тўлов контракт асосида ўқишга қабул қилинганман, лекин ўқишга шароитим бўлмаган. Ўқишга яна тайёрландим, келаси йили эса Тошкент давлат техника университетининг нефть-газ бўлимига ўқишга топширдим. Мўйноқда айнан шу соҳа бўйича ишлар бошланаётган эди. Аммо унда мен умуман киролмадим. Кейин эса яна турли фанлардан ўқишга тайёрланиб юрдим, шу билан бирга, ишладим ҳам. Чунки даромад топиб, оиламга ёрдам беришим керак эди. 2004 йилда эса ўз мақсадимга ҳам эришдим — Нукус давлат педагогика институтининг Миллий истиқлол ғояси ва маънавият асослари факультетига ўқишга кирдим. Ўқиш давомида маҳалламиздаги «Амударё» МЧЖ балиқчилик фирмасида ишлаб келдим. Ўқишни 2008 йили битирганимда ҳам ўша ерда ишлардим.

2011 йили Мўйноқ тумани ҳокимлигига етакчи мутахассис лавозимига ишга келдим. Ушбу лавозимда 4 йил ишладим, кейин 1 йил давомида бош мутахассис лавозимида ишладим. 2017 йилнинг март ойидан бошлаб туман ҳокимнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишладим. 2022 йилнинг январь ойига қадар шу лавозимда ишлаб келдим, 10 январдан бошлаб эса янги ташкил қилинган туман ҳокимининг ёрдамчиси лавозимида иш бошладим.

Президентимизнинг Мўйноққа келишлари ҳақида эшитганимизда бунга тайёргарлик кўра бошладик. Мен бунга қадар президентнинг икки марта йиғилишда қатнашган эдим. Дастлаб 2018 йили Қорақалпоғистонга, жумладан, Мўйноқ туманига ташрифи давомида, сўнг 2019 йили ташриф буюрганларида иштирок этганман. Бу йилгисида мени ҳоким ёрдамчиси сифатида таклиф қилишди. Давлат раҳбари йиғилиш давомида ҳоким ёрдамчиларига ҳам сўз берди. Шу вақтда мен ҳам президент билан гаплашиш бахтига муяссар бўлдим. Суҳбат давомида мен ўз фаолиятим, маҳаллабай ишлашнинг афзалликлари, келажакдаги режаларимни аниқ айтиб бердим. Шу учрашувдан бир ҳафта ўтар-ўтмас мен ҳоким лавозимига таклиф қилиб, тайинлашди.

Биз Мўйноқ тумани ривожлантиришга қаратилган жорий йилдаги «йўл харитасини» ишлаб чиқдик. Бунда тадбиркорлик, қишлоқ хўжалиги, туризм, саноат соҳаларни ривожлантириш борасида режалар ўрин олган. Шунингдек, президентимиз ҳафтада икки марта Тошкент—Нукус—Мўйноқ йўналишида авиапарвозларни йўлга қўйиш топшириғини берди. Наврўз байрами арафасида биринчи авиапарвозни амалга оширишни режа қиляпмиз. Аэропорт доимий ишласа туманда яшовчи кўпгина фуқаролар иш билан таъминланади, уларнинг бандлиги таъминланади.

Бундан ташқари, Мўйноқ туманига Тошкент вилояти бириктирилган. Улар билан ҳам биргаликда ишлаяпмиз. Тошкент вилояти ҳокимлиги 200 миллиард сўмдан ортиқ бизнес лойиҳалари билан туманимизда ишларни амалга оширади. Шу каби лойиҳаларни амалга ошириш натижасида 500 дан 1000 нафаргача фуқарони иш билан таъминлаш мақсад қилинган.

Мўйноқ тумани ҳокими Бахтияр Менглибеков

Ўзбекистон президентининг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчисининг биринчи ўринбосари Қаҳрамон Қуронбоев Мўйноққа тайинланган янги ҳоким ҳақида эълон қиларкан, номзоднинг Президент ҳузуридаги Давлат хизматини ривожлантириш агентлиги томонидан Миллий кадрлар захирага олингани айтиб ўтган эди.

«Фаолиятини самарали олиб бораётган маҳалладаги ҳоким ёрдамчилари ва ёшлар етакчиларини Миллий кадрлар захирасига киритиш давом этмоқда», — деб ёзган Қаҳрамон Қуронбоев.

Айтиш мумкинки, бу ҳали бошланиши. Юқорида ҳоким ёрдамчиларига қандай шароит яратиб берилган-у, уларнинг иш фаолияти қай тарзда рағбатлантирилиши ҳақида сўзладик. Қилинган ҳеч бир яхши иш давлат томонидан бееътибор қолмаслигига яна бир далил десак, ёлғон бўлмайди.