Qashqadaryo viloyati hokimi Murodjon Azimov boshchiligida shahar, tuman hokimlari va tadbirkorlardan iborat delegatsiya kichik sanoat zonalari tashkil etish va tadbirkorlikni rivojlantirish tizimi bilan tanishish maqsadida Namanganga keldi. Bu haqda “Daryo” muxbiri Azizbek Abduvaliyev xabar bermoqda.
Dastlab delegatsiya vakillari Davlatobod tumanidagi “Orzu” kichik sanoat zonasida bo‘lib, bu yerda Ideal Textile-Orzu korxonasi faoliyati bilan tanishdi. 450 nafardan ortiq ishchi-xodim mehnat qilayotgan mazkur korxonada kostyum-shim, maxsus uniforma va qishki kiyimlar ishlab chiqarilmoqda. Tayyor mahsulotlar Rossiya, Italiya va Gollandiyaga eksport qilinmoqda.
Keyingi manzil “Yangi hayot” kichik sanoat zonasi bo‘ldi. Ushbu kichik sanoat zonasida umumiy qiymati 35,9 milliard so‘mlik 16 ta loyiha amalga oshirilishi natijasida 1104 ta yangi ish o‘rni yaratilgan.
Qashqadaryo delegatsiyasi Davlatobod tumanidagi “Yuksalish”, “Yoshlar” va “Kushon” kichik sanoat zonalari bilan ham tanishdi. Xususan, “Yuksalish” kichik sanoat zonasidagi Glass Expo korxonasi mehmonlarda katta taassurot qoldirdi.
Bu yerda oynaga milliy naqshlar va zamonaviy dizayn asosida ishlov beriladi. Viloyatda oyna mahsulotlarini mahalliylashtirish, import o‘rnini to‘ldirishda alohida o‘rni bo‘lgan korxona to‘la quvvat bilan ishga tushgach, yiliga 1,2 million dollarlik mahsulot eksport qilish imkoniyatiga ega bo‘ladi.
Qashqadaryo viloyati hokimi boshchiligidagi delegatsiyaning Namanganga safari davom etmoqda.
Izoh (0)