Yangi Zelandiya 100 dan ortiq rossiyalik siyosatchi, biznesmen va ularning qarindoshlarini mamlakatga kirishini taqiqladi. Bu haqda Yangi Zelandiya Ichki ishlar va savdo vazirligi saytida ma’lum qilindi.
Sanksiyalar ro‘yxatiga, jumladan, Rossiya prezidenti Vladimir Putin, bosh vazir Mixail Mishustin, tashqi ishlar vaziri Sergey Lavrov, mudofaa vaziri Sergey Shoygu, FXX rahbari Aleksandr Bortnikov, “Sberbank” rahbari German Gref, RT telekanali bosh muharriri Margarita Simonyan kiritilgan.
Bundan oldin AQSh, Yevropa Ittifoqi, Buyuk Britaniya, Kanada va Yaponiya ham Rossiya prezidentiga qarshi sanksiyalar e’lon qilgandi. AQSh Peskov, Usmonov, Rotenberglar va ularning oila a’zolariga qarshi sanksiyalar kiritgan.
Shuningdek, g‘arb davlatlari Rossiyaga qarshi iqtisodiy sanksiyalarni ham joriy etgan. Rossiya Markaziy bankining xorijdagi aktivlarini “muzlatilishi” ular orasidagi eng qattig‘i hisoblanadi. 2-mart kuni Yevropa Ittifoqi Rossiyaning Ukrainada maxsus harbiy operatsiyalarini boshlagani tufayli joriy qilingan sanksiyalar doirasida 12-martdan boshlab mamlakatning yettita banki SWIFT banklararo to‘lovlar tizimidan uzib qo‘yilishini e’lon qilgani haqida xabar berilgan edi. Janubiy Koreya Rossiya Markaziy bankiga qarshi sanksiyalar kiritmoqchi, Britaniya Rossiyani Interpoldan chetlatishga chaqirgan. Jahon banki Rossiya va Belarusdagi barcha dasturlarini to‘xtatgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)