Yevropada gaz narxi yana bir bor o‘zining tarixiy maksimalini yangiladi va har ming kub metr uchun 3000 dollardan oshdi. Bu haqda Londonning ICE Futures birjasi ma’lumotlariga tayanib, “Interfaks” xabar bermoqda.
Aprel fyucherslari 7-mart kuni savdolar ochilishida ming kub metr uchun 2367 dollarni tashkil etgan bo‘lsa, tez orada 3266 dollargacha ko‘tarildi.
Fevral oyida gaz uchun o‘rtacha narx ming kub metriga 935 dollarni tashkil etdi.
Yevropada gaz narxi 2021-yilning bahoridan beri oshib bormoqda. Bir yil avval gaz narxi 250-300 dollar edi va dekabr oyida birinchi marta 2000 dollardan oshdi.
Mutaxassislar narxlarning oshishini Osiyoda suyultirilgan gazga bo‘lgan talab, yirik yetkazib beruvchilar tomonidan cheklangan ta’minot va Yevropadagi yerosti omborlari bilan bandlik darajasi pastligi bilan izohladi.
Gaz narxi oshishining qo‘shimcha omili Rossiyaning DXR va LXR mustaqilligini tan olishi, shuningdek, Ukrainadagi harbiy harakatlari va undan keyin Rossiyaga qarshi sanksiyalar joriy etilishi bo‘ldi. Jumladan, Rossiyadan Germaniyaga o‘tadigan “Shimoliy oqim 2” gaz quvuri loyihasi muzlatib qo‘yilgani ham bunga sabab bo‘ldi.
Avvalroq Yevropada gaz narxi ming kubometr uchun qariyb 2400 dollarga yetgani haqida xabar berilgan edi.
Izoh (0)