Janubiy Koreya Rossiya Markaziy banki bilan barcha tranzaksiyalarni to‘xtatadi. Bu haqda mamlakat ichki ishlar vazirligi xabar berdi. Mazkur qaror Ukrainaga nisbatan amalga oshirilayotgan harbiy operatsiyalarga javob tariqasida qabul qilingan.
Janubiy Koreya yangi sanksiyalarga oid batafsil ma’lumotlarni hukumat bilan konsultatsiya o‘tkazib olganidan so‘ng, e’lon qiladi. Seul o‘z qarori haqida Rossiyaga qarshi sanksiyalar qo‘llagan AQSh va boshqa mamlakatlarni xabardor qilishini bildirgan. Bundan oldin Janubiy Koreya Rossiyaning yettita banki, jumladan, “Sberbank”, “VTB” va “VEB”ga qarshi sanksiyalar joriy etgandi.
Shuningdek, Buyuk Britaniya TIV rahbari Priti Patel Interpoldan Rossiyaning tashkilot tizimlaridan foydalanishini to‘xtatishni so‘ragan. “Men bugun AQSh, Kanada, Avstraliya va Yangi Zelandiyadagi hamkorlarim bilan bir qatorda Interpol hamda uning ijroiya qo‘mitasini shu haftada Rossiyaning o‘z tizimlariga kirishini darhol to‘xtatish to‘g‘risida qaror qabul qilishga chaqirib, xat yo‘lladim”, — deb yozadi Patel Twitter’dagi sahifasiga.
Uning fikricha, Rossiyaning harakatlari insonlar xavfsizligi va huquqni muhofaza qilish organlarining xalqaro hamkorligiga “to‘g‘ridan to‘g‘ri tahdiddir”.
24-fevral kunidan beri Rossiya Ukrainada harbiy operatsiyalarni o‘tkazmoqda. Avvalroq Yevroittifoq Rossiyaga qarshi yangi sanksiyalarni e’lon qildi: ayrim banklar SWIFT tizimidan uziladi, Markaziy bank aktivlari esa “falajlantirilishi”, Yevropa Ittifoqi Rossiyaning 7 ta bankini SWIFT’dan uzish masalasini muhokama qilayotgani, Rossiyaning sanksiyaga uchragan banklari Visa va Mastercard kartalarini chiqara olmasligi haqida xabarlar berilgan. Shuningdek, AQSh hukumati Rossiya elitasi, ularning oila a’zolari va kompaniyalariga qarshi sanksiyalar joriy etgan. Ularning Amerikadagi aktivlari “muzlatiladi”, mol-mulki — bloklanadi.
Izoh (0)