“Dahshatli qotillik ko‘z o‘ngimda ikki kishi tomonidan sodir etildi. Ammo ikkinchi shaxs sudda ko‘rinmayapti”. Marhum sportchi Kamoliddin Rasulovning xotini qotillik voqeasi haqida

Marhum sportchi, 2012-yilda o‘tkazilgan sambo bo‘yicha o‘smirlar o‘rtasidagi jahon chempionati g‘olibi Kamoliddin Rasulov o‘limi yuzasidan 2022-yilning 8-fevral kuni boshlangan sud majlisi 4-mart kuni o‘z ishini davom ettirdi, deya xabar berdi “Daryo” muxbiri.

Sudda so‘z olgan marhumning xotini Gulnoza Xolmurodova prokurorning savoliga javob berar ekan, dahshatli qotillik ko‘z o‘ngida sodir etilganini, qotillik voqeasida ikki kishi ishtirok etganini, ammo ikkinchi kishi sudda ko‘rinish bermayotganini aytmoqda.

Sud ishida qatnashayotgan prokuror marhumning xotiniga yuzlanib, “akasi bilan qotillik sodir etdi deganingiz nimasi, akasining qotillik voqeasida qanday ishtiroki bor?”, deb so‘radi.

“Voqea sodir bo‘lgan kuni tergov paytida buning akasi ekani aytilgan odam qotillik sodir etilayotganda Kamol akamning qo‘lidan ushlab, qotillik sodir etayotgan ukasiga ko‘mak berdi. Unga yordamlashdi. Qolaversa, sud majlislarida ‘men akasiman’ deya guvohlik bergan kishi voqea sodir bo‘lgan kundagi insondan umuman farq qiladi. O‘sha kuni men ko‘rgan odam boshqa edi. Uning bo‘yi past va gavdali, qotillikda ayblanayotgan odamga o‘xshash gavdali odam edi. U sud boshlanganidan beri ko‘rinish bermadi”, — deydi marhumning xotini.

Sudda ta’kidlanishicha, voqea guvohlaridan biri sudga takroriy chaqirtirilganiga qaramay, sudga sababsiz kelmayapti.

“Tergov paytida voqea guvohi sifatida gapirgan kishi sudga kelmayapti. Unga bosim o‘tkazilgan, degan taxminimiz bor. Boisi u voqea qanday bo‘lganini, qotillik necha kishi tomonidan sodir etilganini biladi. Ko‘rgan. Sud aynan o‘sha guvohni sud zaliga mujburiy tartibda bo‘lsa-da, olib keltirishi kerak. U inson tergovda aytgan ma’lumotlarini sudda ham aytib berishi kerak”, — deydi marhumning xotini Gulnoza Xolmurodova.

Sud 2022-yilning 9-mart kuni soat 17:00 ga qadar tanaffus e’lon qildi.

Sambo bo‘yicha jahon chempioni 29 yoshli Kamoliddin Rasulov 2021-yilning 13-sentabr kuni soat 21:30 da Toshkent shahrining Uchtepa tumanidagi ko‘p qavatli uylar oldida boshqa bir sportchi tomonidan pichoqlab o‘ldirilgandi. Bosh prokuratura axborot xizmatining rasmiy ma’lumotida chempion yigitning pichoqlanishiga uning gumonlanuvchi tanishiga “Humo Trop” vitaminini tavsiya qilgani, oqibatda esa gumonlanuvchining sog‘lig‘i yomonlashgani, shifokorlar bu kasallikning davosi yo‘qligini bildirgani xabar berilgandi.

Jinoyat ishlari bo‘yicha Uchtepa tuman sudida so‘z olgan guvoh ham tanishi, sudda ayblanuvchi sifatida ishtirok etayotgan Sh.T. marhum Kamoliddin Rasulov tavsiya qilgan vitaminni aytilgan miqdordan ko‘ra ko‘proq iste’mol qilgani sabab sog‘lig‘i yomonlashganini, kechalari issig‘i chiqib, uxlolmaydigan bo‘lib qolganini aytdi. Voqea sodir bo‘lgan kuni pichoqdan jarohatlangan sportchini ikki kishi quvlab ketayotganini jamoatchilikka oshkor qilgan “Markaziy studiya” ko‘rsatuvi muxbiriga intervyu bergan noma’lum suhbatdosh esa vitaminni qabul qilgan sportchiga shifokorlar endi o‘lasan, deb aytishganini, sportchi shu sabab men o‘lsam, uyam o‘ladi, deya marhumni pichoqlaganini aytgandi.