Toshkent shahri Yunusobod tumanida 4 nafar egizak — 3 o‘g‘il, 1 qiz tug‘ilgani haqida xabar berilgandi. Sog‘liqni saqlash vazirligi chaqaloqlarning ahvoli haqida ma’lumot berdi.
Qayd etilishicha, 6-mart kuni shu tumanda yashovchi Kamola Shukrullayeva hamda uning turmush o‘rtog‘i — tuman ichki ishlar bo‘limi leytenanti Behruz Xudoyberdiyev biryo‘la 4 nafar egizakning ota-onasiga aylangan. Respublika perinatal markazida chaqaloqlarning sog‘lom tug‘ilishi uchun zarur sharoit hozirlanib, kesarcha usulida, asoratsiz tug‘uruq amaliyoti o‘tkazilgan. Natijada og‘irligi 1,5, 2,3 va 2,5 kilogrammlik 3 nafar o‘g‘il hamda 2,3 kilogrammlik qizaloq dunyoga kelgan.
“Hozirda go‘daklarning ahvoli yaxshi. Ularning zarur vitaminlar hamda ona suti bilan oziqlanishi neonatolog shifokor va hamshiralar nazorati ostida”, — deyiladi SSV xabarida.
Ta’kidlanishicha, bu 2022-yilda Respublika perinatal markazida to‘rt nafar egizak tug‘ilishi bilan bog‘liq uchinchi holat hisoblanadi.
Toshkent shahar Ichki ishlar bosh boshqarmasi chaqaloqlar 5-mart kuni tug‘ilganini ma’lum qilgan. SSV taqdim etgan ma’lumotda esa tug‘ilish sanasi 6-mart etib ko‘rsatilgan.
Eslatib o‘tamiz, 25-yanvar kuni Toshkent viloyati Qibray tumanida yashovchi Toirovlar oilasida to‘rt egizak dunyoga kelgandi. Egizaklarning otasiga ko‘ra, ikki qiz va ikki o‘g‘il farzandlarining ahvoli qoniqarli darajada.
Ma’lumot uchun, O‘zbekistonda 2021-yilning yanvar—noyabr oylarida 16 ming 822 nafar egizak chaqaloq tug‘ilgan. 2021-yil 1-dekabr holatiga ko‘ra, O‘zbekistonda 832,4 ming tug‘ilish qayd etilgan. Noyabr oyining o‘zida esa respublikada jami 79 213 ta chaqaloq tug‘ilgan. Davlat statistika qo‘mitasi ma’lumotlariga ko‘ra, O‘zbekistonda 10 yil davomida uch nafar egizaklar tug‘ilishi 4 baravarga ko‘paydi. 2021-yilning birinchi yarmida egizaklar soni bo‘yicha Samarqand viloyati yetakchi bo‘lgan.
Izoh (0)